ఆషాఢ మాసంలో గోరింటాకు వేడుక.. ఘనంగా జరుపుకున్న వరంగల్ మహిళలు

ఆషాఢ మాసంలో గోరింటాకు పండుగను వరంగల్ మహిళలు ఘనంగా నిర్వహించారు. ఇన్నర్వీల్ క్లబ్ ఆఫ్ వరంగల్ మహిళా సంఘం ఆధ్వర్యంలో ఈ వేడుక జరిగింది.

గౌరీదేవి ఇంటి ఆకుగా భావించే గోరింటాకును ఆషాఢంలో పెట్టుకోవడం సంప్రదాయం. శుభానికి, సౌభాగ్యానికి ప్రతీకగా దీనిని మహిళలు విశ్వసిస్తారు. ఈ కార్యక్రమంలో గౌరీమాతకు ప్రత్యేక పూజలు చేసి, గోరింటాకు రుబ్బి ఒకరికొకరు చేతులకు పెట్టుకున్నారు. పాటలు, ఆటలతో సందడి నెలకొంది.

గోరింటాకు ఆరోగ్యానికి కూడా మేలు చేస్తుందని మహిళలు తెలిపారు. నెయిల్ ఇన్ఫెక్షన్లు, వర్షాకాలంలో వచ్చే ఇన్ఫెక్షన్ల నుంచి రక్షణగా ఉంటుందని, శరీర ఉష్ణోగ్రతను సమతుల్యం చేస్తుందని వివరించారు. గోరింటాకు బాగా పండితే అదృష్టం కలిగిస్తుందనే విశ్వాసం వారిలో ఉంది.

ఈ ఏడాది ఒక్కసారే వచ్చే ఈ పండుగ కోసం ఎదురుచూస్తామని, తమ సంప్రదాయాలను కొనసాగిస్తామని పాల్గొన్న మహిళలు చెప్పారు. పల్లెలతో పాటు పట్టణాల్లో కూడా గోరింటాకు వేడుకలు పెద్ద ఎత్తున జరుగుతున్నాయి.