పశ్చిమ బెంగాల్‌లో 11 ఏళ్ల బాలిక హత్య; ఒక నిందితుడు ప్రజల దాడిలో మృతి

శనివారం పశ్చిమ బెంగాల్‌లోని దక్షిణ 24 పరగణాల జిల్లాలో 11 ఏళ్ల బాలిక కనిపించకుండా పోయింది. బాలిక ఒక స్నేహితురాలి బర్త్‌డే కోసం గిఫ్ట్ కొనేందుకు బయటకు వెళ్లి తిరిగి రాలేదు. కుటుంబ సభ్యులు పోలీసులకు ఫిర్యాదు చేశారు.

తర్వాత బరూర్‌పూర్ ప్రాంతంలోని సుజాపూర్ హాట్‌లో ఒక సంచిలో బాలిక మృతదేహం లభ్యమైంది. బాలికపై అత్యాచారం జరిగి హత్య చేసినట్లు పోలీసులు అనుమానిస్తున్నారు. అనుమానితుడు ఇచ్చిన సమాచారంతో మృతదేహాన్ని గుర్తించారు.

మృతదేహం బయటపడిన తర్వాత స్థానికులు తీవ్ర నిరసన వ్యక్తం చేశారు. బరయిపూర్ జోయి నగర్ రోడ్డును దిగ్బంధించి, టైర్లు తగలబెట్టారు. పోలీసు వాహనాలపై కూడా దాడి చేశారు. నిందితులను వెంటనే అరెస్ట్ చేయాలని డిమాండ్ చేశారు.

నిరసన సమయంలో అనుమానితుడిపై ప్రజలు దాడి చేశారు. దాడిలో తీవ్రంగా గాయపడిన ఆ వ్యక్తి ఆస్పత్రిలో మరణించాడు.

పరిస్థితిని అదుపు చేయడానికి ఐజీ కంకర్ ప్రసాద్ బారు సంఘటన స్థలానికి వచ్చారు. నిందితులను అరెస్ట్ చేసి కఠిన శిక్ష పడేలా చూస్తామని హామీ ఇచ్చారు. దీంతో నిరసనకారులు రోడ్డు దిగ్బంధాన్ని విరమించారు.

పోలీసులు స్థానిక బీజేపీ నాయకుడు శాంతను మండల్‌ను అదుపులోకి తీసుకున్నారు. మరో నలుగురు నిందితులను అరెస్ట్ చేశారు. మిగిలిన నిందితుల కోసం గాలింపు కొనసాగుతోంది.