తెలంగాణ కొత్త CS ఎవరు? రేసులో సీనియర్ IAS అధికారులు

తెలంగాణ కొత్త ముఖ్య కార్యదర్శి ఎవరు అనే ప్రశ్నకు దాదాపు సమాధానం దొరికింది. ప్రస్తుత CS రామకృష్ణరావు పదవీ కాలం ఈ నెల 30తో ముగుస్తుంది. ఆయనకు ఇప్పటికే రెండుసార్లు పదవీ కాల పొడిగింపు ఇచ్చారు. ఈసారి మాత్రం కొత్తవారినే నియమించే అవకాశం ఉన్నట్లు తెలుస్తోంది.

1992 బ్యాచ్‌కు చెందిన సీనియర్ IAS అధికారి సంజయ్ జాజు కేంద్ర సర్వీసుల నుంచి రిలీవ్ అయ్యారు. ఆయన ప్రస్తుతం మినిస్ట్రీ ఆఫ్ డెవలప్‌మెంట్ ఆఫ్ నార్త్ ఈస్టర్న్ రీజియన్ సెక్రెటరీగా పని చేశారు. తెలంగాణ ప్రభుత్వం చేసిన విజ్ఞప్తితో DOPT ఉత్తర్వులు జారీ చేసి ఆయనను పేరెంట్ క్యాడర్‌కు బదిలీ చేసింది. రాష్ట్ర పరిపాలనపై సుదీర్ఘ అనుభవం ఉన్న జాజును CS స్థానంలో నియమించేందుకు రేవంత్ రెడ్డి సర్కార్ మొగ్గు చూపినట్లు సమాచారం.

ఢిల్లీ పర్యటన సమయంలో ముఖ్యమంత్రి రేవంత్ రెడ్డిని సంజయ్ జాజు మర్యాదపూర్వకంగా కలిశారు. రాష్ట్రంలో తాజా పరిణామాలు, పరిపాలన పరమైన అంశాలపై వారిద్దరి మధ్య చర్చలు జరిగినట్లు తెలుస్తోంది.

CS పోస్టు కోసం 1992 బ్యాచ్‌కు చెందిన ముగ్గురు సీనియర్ అధికారుల మధ్య పోటీ ఉన్నట్లు సమాచారం. సంజయ్ జాజుతో పాటు జయేష్ రంజన్, వికాస్ రాజ్ పేర్లు కూడా వినిపిస్తున్నాయి. జయేష్ రంజన్ పరిశ్రమలు మరియు పెట్టుబడుల శాఖలో కీలక పాత్ర పోషిస్తున్నారు. వికాస్ రాజ్ రవాణా, రోడ్లు మరియు భవనాల శాఖలో బాధ్యతలు నిర్వహిస్తున్నారు.

కొత్త CS నియామకానికి సంబంధించిన అధికారిక ఉత్తర్వులు రానున్న ఒకటి రెండు రోజుల్లోనే తెలంగాణ ప్రభుత్వం నుంచి వెలువడే అవకాశాలు కనిపిస్తున్నాయి.