44 ఏళ్లుగా భర్త కోసం ఎదురుచూసిన లక్ష్మికి శవమై తిరిగొచ్చిన చంద్రయ్య

సిద్దిపేట జిల్లా దుబ్బాక మండలం చెల్లాపూర్‌కు చెందిన లక్ష్మి 44 ఏళ్లు తన భర్త చంద్రయ్య కోసం ఎదురుచూశారు. 1982లో చంద్రయ్య సౌదీ అరేబియాకు ఉపాధి కోసం వెళ్లిన తర్వాత ఎప్పుడూ తిరిగి రాలేదు. కుటుంబాన్ని ఏ మాత్రం సంప్రదించలేదు.

చంద్రయ్య వెళ్లేటప్పుడు తన వృద్ధ తల్లిదండ్రులను అదే గ్రామంలో వదిలేశారు. లక్ష్మి ఆ వృద్ధులను చూసుకుంటూ వారు చనిపోయినప్పుడు కోడలిగానే అంత్యక్రియలు నిర్వహించారు. ఈలోగా చంద్రయ్య నుంచి ఎలాంటి సమాచారం రాలేదు.

15 ఏళ్ల క్రితమే చంద్రయ్య వీసా గడువు ముగిసింది. నెల క్రితం సౌదీలోని ఓ ఆసుపత్రిలో మృతి చెందారు. అక్కడి అధికారులు పాత వీసా వివరాల ఆధారంగా స్వస్థలాన్ని గుర్తించి దౌత్య కార్యాలయానికి తెలిపారు. ప్రవాసి తెలుగు సంఘం కార్యకర్త ఫారుక్ సామాజిక మాధ్యమాల ద్వారా కుటుంబాన్ని వెతికి పట్టారు. చివరకు మృతదేహం విమానంలో స్వదేశానికి చేరింది.

ఈ ఘటనపై లక్ష్మి మాట్లాడుతూ.. "భర్త ఇన్నేళ్లలో ఒక్కసారైనా ఫోన్ చేయలేదు, డబ్బు పంపలేదు. ప్రభుత్వం నన్ను ఒంటరి మహిళగా గుర్తించి పించన్ ఇస్తోంది" అని ఆవేదన వ్యక్తం చేశారు. ఈ నెలలోనే చంద్రయ్య అంత్యక్రియలు నిర్వహించారు.