అమర్నాథ్ మంచు శివలింగం ఐదు రోజుల్లోనే కరిగిపోయింది

అమర్నాథ్ గుహలో సహజంగా ఏర్పడే మంచు శివలింగం యాత్ర ప్రారంభమైన ఐదు రోజుల్లోనే 90% కరిగిపోయింది. జమ్మూ కాశ్మీర్లోని అమర్నాథ్ గుహ సముద్రమట్టానికి 3,880 మీటర్ల ఎత్తున ఉంది. ఇక్కడ ఏటా సహజంగా ఏర్పడే మంచు శివలింగాన్ని 'బాబా బర్ఫానీ' అని పిలుస్తారు. ఈ ఏడాది శివలింగం ఏర్పడిన వారం రోజుల్లోనే దాదాపు పూర్తిగా కరిగిపోయింది.

వాతావరణ మార్పులే ఇందుకు ప్రధాన కారణమని శాస్త్రవేత్తలు హెచ్చరిస్తున్నారు. హిమాలయాలు ఇతర పర్వత ప్రాంతాల కంటే వేగంగా వేడెక్కుతున్నాయి. దీంతో గుహలోని మంచు త్వరగా కరుగుతోంది. గతంలో శివలింగం 40 నుంచి 45 రోజుల పాటు దర్శనమిచ్చేది. 2018లో 29 రోజులు, 2020లో 38 రోజులు, 2022లో 28 రోజుల్లో కరిగిపోయింది. 2024లో కేవలం 7 రోజుల్లోనే కరిగింది. ఈ ఏడాది యాత్ర మొదలైన ఐదవ రోజునే శివలింగం దాదాపు కనిపించకుండా పోయింది.

వాతావరణ మార్పులతో పాటు మానవ కార్యకలాపాలు కూడా శివలింగం కరగడానికి కారణమని పర్యావరణ వేత్తలు విమర్శిస్తున్నారు. రోడ్ల విస్తరణ, భారీ యంత్రాల వినియోగం, ప్రతిపాదిత రోప్వే ప్రాజెక్టుల వల్ల ఆ ప్రాంతంలోని సూక్ష్మ వాతావరణం దెబ్బతింటోందని వారు ఆందోళన వ్యక్తం చేస్తున్నారు. దీనివల్ల మంచు శివలింగం త్వరగా కరిగిపోతోందని విమర్శలు వినిపిస్తున్నాయి. ఇప్పటికే వేలాది మంది భక్తులు యాత్ర మార్గంలో ఉన్నారు. శివలింగం పూర్తిగా కరిగిపోకముందే దర్శనం చేసుకోవాలని వారు కోరుతున్నారు.