ఏలూరు జిల్లాలో మహిళ పచ్చళ్ల వ్యాపారం: కేవలం 9 కేజీలతో మొదలై 30 క్వింటాళ్ల ఉత్పత్తి

ఏలూరు జిల్లా చింతలపూడి మండలం రాఘవాపురం గ్రామానికి చెందిన చొల్లేటి రమాదేవి పచ్చళ్ల తయారీతో స్వయం ఉపాధి పొందుతూ 10 మందికి ఉపాధి కల్పిస్తున్నారు. కేవలం 9 కేజీల తయారీతో మొదలైన ఆమె ప్రయాణం ఇప్పుడు 30 క్వింటాళ్ల భారీ ఉత్పత్తి స్థాయికి చేరుకుంది.

రమాదేవి పుల్లల పొయ్యి, రోటి దంపుడు, మట్టి పాత్రలు వంటి సంప్రదాయ పద్ధతులతో పచ్చళ్లు తయారు చేస్తారు. 'పునర్వ' పేరుతో మార్కెట్ చేస్తున్న ఈ పచ్చళ్లకు స్థానికంగా మంచి ఆదరణ లభిస్తోంది. ఆమె ప్రస్తుతం 30 రకాల పచ్చళ్లు, 15 రకాల కారపొళ్లు తయారు చేస్తున్నారు. నల్లేరు, పునర్నావ వంటి ఆర్గానిక్ ముడి పదార్థాలను అడవుల నుంచి సేకరించి ఎలాంటి కల్తీ లేకుండా ఉత్పత్తులు సిద్ధం చేస్తున్నారు.

వ్యాపారం విస్తరించిన క్రమంలో రమాదేవి జిల్లా గ్రామీణాభివృద్ధి సంస్థ (DRDA) సాయంతో ఫుడ్ లైసెన్స్ పొందారు. కలెక్టర్, DRDA అధికారులు ఆమె ఉత్పత్తులను పరిశీలించి ప్రోత్సహించారు. ఆమె గుంటూరు, కాకినాడ తదితర ప్రాంతాల్లో జరిగిన ప్రదర్శనల్లో పాల్గొని విక్రయాలు జరిపారు. DRDA కార్యాలయంలో ప్యాకింగ్, మార్కెటింగ్, లైసెన్స్ తీసుకోవడంపై కౌన్సెలింగ్ కూడా అందించారని ఆమె తెలిపారు.

తనలాగే ఇతర గ్రామీణ మహిళలు భయపడకుండా స్వయం ఉపాధి ప్రారంభించాలని రమాదేవి సూచిస్తున్నారు. 'ప్రభుత్వం ఇస్తున్న సహకారంతో ఎవరైనా చిన్నగా మొదలుపెట్టి అభివృద్ధి చెందవచ్చు' అని ఆమె పేర్కొన్నారు. సేంద్రియ పద్ధతులపై తనకు ఆసక్తి ఉన్నందున నాణ్యతను ఎప్పుడూ రాజీ పడనని చెప్పారు.