గుంటూరులో మహిళపై దారుణ దాడి; TDP నాయకుడు సస్పెండ్, నిందితుల అరెస్ట్

ఈ నెల 13న రాత్రి గుంటూరులోని కృష్ణబాబు కాలనీలో ఓ మహిళపై మరికొందరు మహిళలు సామూహిక దాడి చేశారు. నిందితులు ఆమెను నడిరోడ్డుపై వివస్త్ర చేసి, పిడిగుద్దులు గుద్దారు. సీసీటీవీ ఫుటేజ్ ఆలస్యంగా వైరల్ కావడంతో ఈ ఘటన వెలుగులోకి వచ్చింది.

వివాదానికి మూలం నీటి నల్లా రిపేర్. బాధితురాలి కుటుంబం వేసుకున్న బోరు నల్లా పాడైపోగా, ఆమె భర్త రిపేర్ చేయించేందుకు సిద్ధమయ్యారు. వార్డ్ సెక్రటరీగా చెప్పుకునే స్థానిక TDP కార్యకర్త మల్లెల మూర్తి రూ.10 వేల లంచం అడిగినట్లు తెలుస్తోంది. డబ్బు ఇవ్వనందుకు వివాదం ముదిరి రాత్రి దాడికి దారితీసింది.

బాధితురాలు ఇచ్చిన ఫిర్యాదు ప్రకారం, తనను వివస్త్రను చేయడంతో పాటు కొట్టి, ఒంటిపై ఉన్న బంగారం, చెప్పులు లాగేసుకున్నారు. దీంతో చెవి తెగిపోయిందని చెప్పారు. భయంతో ఫిర్యాదు చేయడం ఆలస్యం చేశారు.

నగరంపాలెం పోలీసులు మూర్తితో సహా దాడి చేసిన మహిళలను అదుపులోకి తీసుకున్నారు. TDP పార్టీ మూర్తిని సస్పెండ్ చేసింది. కేసు నమోదు చేసి కఠిన చర్యలు తీసుకుంటామని పోలీసులు తెలిపారు.