హైదరాబాద్‌లో జూన్ 24న మహిళా సాధికారత సమ్మిట్; వేటా ఇండియా ప్రారంభం

వేటా ఇండియా పేరుతో కొత్త మహిళా సాధికారత సంస్థ ఈ నెల 24న హైదరాబాద్‌లో అధికారికంగా ప్రారంభం కానుంది. జూబ్లీ హిల్స్‌లోని కన్వెన్షన్ సెంటర్‌లో మహిళా సాధికారత సమ్మిట్ నిర్వహించనున్నామని సంస్థ వ్యవస్థాపకురాలు జాన్సీ రెడ్డి తెలిపారు. బంజారా హిల్స్‌లో సమ్మిట్ పోస్టర్ ఆవిష్కరణ జరిగింది.

2019లో అమెరికాలోని కాలిఫోర్నియాలో ప్రారంభమైన వేటా గ్లోబల్ అనే ఎన్జీఓ ఇప్పుడు భారతదేశంలో విస్తరిస్తోంది. వేటా ఇండియా నాన్ పొలిటికల్ సంస్థ అని, మహిళలు, విద్యార్థినిల అభివృద్ధి కోసం విద్య, ఆరోగ్యం, ఉపాధి, నైపుణ్య అభివృద్ధి రంగాల్లో సేవలు అందించడమే లక్ష్యమని జాన్సీ రెడ్డి చెప్పారు.

కరోనా సమయంలో అపోలో ఆస్పత్రికి 60,000 డాలర్ల వెంటిలేటర్లు కొనుగోలు చేసి ఇవ్వడం, బ్లైండ్ స్కూళ్లకు కంప్యూటర్లు, టూల్స్ అందించడం, చేనేత కార్మికులకు సాయం, తిరుపతి పరిసర ప్రాంతాల్లో స్కూల్ యూనిఫామ్స్ అందించడం వంటి కార్యక్రమాలు ఇప్పటికే చేపట్టినట్లు జాన్సీ రెడ్డి వివరించారు.

వేటా ఇండియా తెలంగాణలోని అన్ని జిల్లాల్లో టీమ్‌లు ఏర్పాటు చేయనుంది. మహిళలకు కౌన్సిలింగ్, లాయర్, డాక్టర్ వంటి అవసరమైన కనెక్షన్లు కల్పించడం, మోటివేషనల్ వర్క్‌షాప్‌లు నిర్వహించడం వంటివి చేపట్టనున్నారు. ఈ సంస్థలో ఇప్పటికే 500 మంది మహిళలు వాలంటీర్లుగా చేరారు. ఆసక్తి ఉన్నవారు వెబ్‌సైట్ లేదా హాట్‌లైన్ నంబర్ ద్వారా సంప్రదించవచ్చని జాన్సీ రెడ్డి తెలిపారు.