అవయవ దాతల్లో మహిళలే 80 శాతానికి పైగా – అధ్యయనం

భారతదేశంలో అవయవ దాతల్లో 80 శాతానికి పైగా మహిళలే ఉన్నట్లు తాజా అధ్యయనం వెల్లడించింది. అవయవ వైఫల్యం బాధితుల్లో మహిళలు, పురుషులు దాదాపు సమానంగా ఉన్నారు.

దేశంలో అవయవ మార్పిడి అవసరాలు ఏటా పెరుగుతున్నాయి. 2040 నాటికి ఏటా 4,63,000 అవయవ మార్పిడి అవసరాలు ఉంటాయని అధ్యయనం అంచనా వేసింది. అవయవ మార్పిడుల్లో భారత్ ప్రపంచంలో మూడో స్థానంలో ఉన్నప్పటికీ, అవసరాలకు సరిపడా అవయవాలు అందుబాటులోకి రావడం లేదు.

తమిళనాడు, తెలంగాణ, మహారాష్ట్ర, కేరళ, ఢిల్లీలో దేశ జనాభాలో 29 శాతం మంది ఉన్నారు. దేశవ్యాప్తంగా జరిగే అవయవ మార్పిడుల్లో 80 నుంచి 96 శాతం ఈ ఐదు ప్రాంతాల్లోనే జరుగుతున్నాయి. అవయవ మార్పిడిలో తమిళనాడు మొదటి స్థానంలో, తెలంగాణ రెండో స్థానంలో నిలిచాయి.

2021 లెక్కల ప్రకారం కిడ్నీ మార్పిడి పొందిన వారిలో మహిళల వాటా 36.8 శాతం. లివర్ మార్పిడిలో 30.4 శాతం, ఊపిరితిత్తుల మార్పిడిలో 47.2 శాతం, గుండె మార్పిడిలో 23.5 శాతం మహిళలు ఉన్నారు. అంటే దానం చేయడంలో ముందున్న మహిళలు, తమకు అవయవం అవసరమైనప్పుడు వెనుకబడుతున్నారు.

దేశంలో గత సంవత్సరం 25,000 కు పైగా కిడ్నీ మార్పిడులు జరిగాయి. వీటిలో 85 నుంచి 90 శాతం కుటుంబ సభ్యులు ఇచ్చినవి. మరణించిన వారి నుంచి సుమారు 20 శాతం అవయవాలు సేకరించారు. ఢిల్లీ, మహారాష్ట్రకు చెందిన నెఫ్రాలజీ నిపుణులు ఈ అధ్యయనాన్ని The Lancet Regional Health South East Asia లో ప్రచురించారు.