పర్వతీపురం మన్యం: ప్రపంచ ఆదివాసీ దినోత్సవ వేడుకలు ఘనంగా ప్రారంభం

పర్వతీపురం మన్యం జిల్లాలో ప్రపంచ ఆదివాసి దినోత్సవం (ఆగస్టు 9) ముందస్తు వేడుకలు ఘనంగా ప్రారంభమయ్యాయి. గుమ్మ లక్ష్మీపురం మండలం లోమట గోరడా గ్రామంలో గిరిజన సంఘాలు ఈ కార్యక్రమాలను నిర్వహించాయి.

ఈ సందర్భంగా గిరిజన మహిళలు, యువత పెద్ద సంఖ్యలో పాల్గొన్నారు. సంప్రదాయ దుస్తులు ధరించి దింసా నృత్యాలు చేస్తూ గ్రామ వీధుల్లో సందడి చేశారు. స్థానికులు వీటిని ఆసక్తిగా తిలకించారు.

నిర్వాహకులు మాట్లాడుతూ, ఆదివాసీ సంస్కృతి, సంప్రదాయాలు, ఆచార వ్యవహారాలను భావి తరాలకు పరిచయం చేయడం, వాటి సంరక్షణపై అవగాహన కల్పించడం ఈ కార్యక్రమ లక్ష్యమని చెప్పారు. ఆగస్టు 9న జరగనున్న ప్రధాన వేడుకలకు ముందు ఈ కార్యక్రమం నిర్వహించామని తెలిపారు.

గిరిజన సంఘాల నాయకులు ఆదివాసీ సంస్కృతిని కాపాడేందుకు అందరూ కృషి చేయాలని పిలుపునిచ్చారు. కార్యక్రమం అనంతరం గ్రామంలో పండుగ వాతావరణం నెలకొంది.