వైరా మున్సిపాలిటీలో కాంగ్రెస్ వర్గపోరు; చైర్‌పర్సన్ భర్త జోక్యంపై వివాదం

ఖమ్మం జిల్లా వైరా మున్సిపాలిటీలో కాంగ్రెస్ పార్టీ అంతర్గత విభేదాలు తీవ్రమయ్యాయి. చైర్‌పర్సన్ కాపా చంద్రకల భర్త కాపా మురళి కృష్ణ మున్సిపల్ వ్యవహారాల్లో జోక్యం చేసుకుంటున్నారంటూ వైస్ చైర్మన్ కట్ల సంతోష్ నేరుగా కమిషనర్‌కు ఫిర్యాదు చేశారు.

సంతోష్ MP రేణుక వర్గానికి చెందిన వ్యక్తి కాగా, మురళి కృష్ణ DCC అధ్యక్షుడి వర్గానికి మద్దతుదారు. మురళి కృష్ణ టెండర్లు, పారిశుద్ధ్య పనులు, సిబ్బంది డ్యూటీలు, అధికారులతో సమీక్షలు వంటి అన్ని మున్సిపల్ కార్యక్రమాల్లో ఏకపక్షంగా వ్యవహరిస్తున్నారని 20 మంది వార్డు కౌన్సిలర్లు సంతకంతో కూడిన వినతిపత్రం ఇచ్చారు.

ఇటీవల జరిగిన మున్సిపల్ సమావేశంలో BRS కౌన్సిలర్ కట్టా స్వరూపరాణి, మురళి కృష్ణ మధ్య తీవ్ర వాగ్వాదం జరిగింది. ఎన్నికైన ప్రతినిధులు కాని వ్యక్తి సభకు హాజరుకావడం, మహిళా ప్రజా ప్రతినిధి పట్ల అనుచితంగా వ్యవహరించడం సరికాదని వివిధ పార్టీల కౌన్సిలర్లు విమర్శించారు.

చైర్‌పర్సన్ భర్త అధికార పరిధి దాటి వ్యవహరిస్తున్నారని, అధికారులు కూడా ఆయన ఆదేశాలను పాటిస్తున్నారనే ఆరోపణలు ఉన్నాయి. దీంతో అభివృద్ధి పనులు నిలిచిపోయాయని, ప్రజా సమస్యలు పరిష్కరించాల్సిన అవసరం ఉందని పట్టణ ప్రజలు డిమాండ్ చేస్తున్నారు. వర్గపోరు కారణంగా పాలన సజావుగా సాగడం లేదని, పాలకవర్గ సభ్యుల మధ్య సమన్వయం పూర్తిగా లోపించిందని విమర్శలు వెల్లువెత్తుతున్నాయి.