మాజీ ఉప సర్పంచ్ హత్య కేసులో భార్యతో సహా 7 మంది అరెస్ట్

మహబూబాబాద్ జిల్లా సింగారం గ్రామంలో మాజీ ఉప సర్పంచ్ పిట్టల యాకయ్య హత్యకేసులో పోలీసులు ఏడుగురిని అరెస్ట్ చేశారు. అరెస్ట్ చేసిన వారిలో యాకయ్య భార్య యశోద కూడా ఉంది.

వివాహేతర సంబంధం, ఆస్తి వివాదాల నేపథ్యంలో యశోదే ఈ హత్యకు పథకం వేసినట్టు పోలీసులు వెల్లడించారు. యాకయ్య మరో మహిళతో సంబంధం కొనసాగిస్తూ, ఆస్తులను ఆమెకు రాస్తాడనే భయంతో యశోద నాలుగు లక్షల రూపాయలు సుపారీ ఇచ్చింది. స్థానికంగా ఉన్న కృష్ణ, ఏత రామ్మోహన్ లతో కలిసి ఎనిమిది నెలలుగా ఆమె కుట్ర పన్నింది.

ఈ నెల 1వ తేదీ తెల్లవారుజామున ఇంటి వరండాలో నిద్రిస్తున్న యాకయ్యపై ఇనుప రాడ్‌తో దాడి చేసి చంపారు. దోపిడీగా చూపేందుకు మెడలోని బంగారు గొలుసు కూడా ఎత్తుకెళ్లారు.

పోలీసులు ఏడుగురు నిందితుల నుండి ఏడు సెల్‌ఫోన్లు, ఇనుప రాడ్, రెండు ద్విచక్ర వాహనాలు, బంగారు గొలుసు స్వాధీనం చేసుకున్నారు. యాకయ్య తండ్రి ఇచ్చిన ఫిర్యాదు ఆధారంగా దర్యాప్తు ప్రారంభించిన పోలీసులు, ఆయన భార్యాభర్తల మధ్య తరచూ గొడవలు జరిగేవని తెలిపారు. నిందితులను రిమాండ్‌కు తరలించారు.