యమునా పుష్కరాలు: ప్రత్యేకతలు, పితృ తర్పణాలు, స్నాన విధానం

ప్రస్తుతం యమునా నది పుష్కరాలు జరుగుతున్నాయి. 12 సంవత్సరాలకు ఒకసారి గురుగ్రహం కర్కాటక రాశిలో ప్రవేశించినప్పుడు యమునా పుష్కరాలు వస్తాయి. ఈసారి అధిక జ్యేష్ఠ మాసం, కృష్ణ పక్షంతో కలిసి రావడం విశేషమని ఆచార్య శ్రీ కాకునూరి సూర్యనారాయణ మూర్తి తెలిపారు.

ఉత్తరాఖండ్‌లోని తెహ్రీ సమీపంలో జన్మించిన యమున 1370 కి.మీ. ప్రవహించి ప్రయాగ్ వద్ద గంగ, సరస్వతితో సంగమించి త్రివేణీ సంగమం ఏర్పడుతుంది. పుష్కర సమయంలో ఈ నదిలో స్నానం చేస్తే పాపాలు తొలగిపోతాయని హిందూ సంప్రదాయం వివరిస్తోంది. యమధర్మరాజు సోదరి అయిన యమున అకాల మృత్యు భయాన్ని తొలగిస్తుందనే నమ్మకం ఉంది.

పుష్కరాల్లో పితృ తర్పణాలు అత్యంత ముఖ్యమైనవి. గతించిన తల్లిదండ్రులు, పితామహులకు నువ్వులతో తర్పణం ఇవ్వాలి. తండ్రి జీవించి ఉంటే బియ్యం వాడాలని ఆచార్యులు సూచించారు. నదీ తీరంలో పిండ ప్రదానం చేస్తే పితృదోషాలు తొలగిపోతాయని, సంతానం, ధనం, ఆరోగ్యం లభిస్తాయని వారు వివరించారు. అలాగే ప్రయాగ్‌లో దంపతులు చేసే వేణీ దానం వల్ల వియోగం ఉండదని చెప్పారు.

దూర ప్రాంతాల్లో ఉండి నదీ స్నానం చేయలేని వారు ఇంట్లో ఇత్తడి గుండిగలో నీరు పోసి ‘గంగేచ యమునేచైవ’ అంటూ ఏడు నదుల పేర్లు చెప్పి పూజించి స్నానం చేయవచ్చని తెలిపారు. చివరగా, నదులను కలుషితం చేయకుండా కాపాడుకోవాలని, ప్లాస్టిక్ వ్యర్థాలు వేస్తే పుణ్యఫలం తగ్గిపోతుందని హెచ్చరించారు.