యమునా పుష్కరాలు 2026 ప్రారంభం: స్నాన విధానం, శ్లోకాలు

2026 సంవత్సరంలో గురు గ్రహం కర్కాటక రాశిలోకి ప్రవేశించిన సందర్భంగా యమునా నదికి పుష్కరాలు ప్రారంభమయ్యాయి. ఈ సమయంలో యమునా నదిలో స్నానం చేయడం విశేష పుణ్యప్రదమని హిందూ శాస్త్రాలు పేర్కొంటున్నాయి.

పుష్కరాల సమయంలో నదిలో త్రిమూర్తులు, దేవగురువు బృహస్పతి, ముక్కోటి దేవతలు నివసిస్తారని, అందువల్ల స్నానం వల్ల వారి అనుగ్రహం లభిస్తుందని పండితులు తెలిపారు. ఈ పుష్కర స్నానాన్ని ‘పుణ్య స్నానం’ అని గ్రంథాలు చెబుతున్నాయి.

యమునా పుష్కర స్నానానికి ప్రత్యేకమైన సంకల్పం, మంత్రాలు ఉన్నాయని పండితులు వివరించారు. స్నానానికి ముందు ఈ సంకల్పం చదువుకోవాలి: ‘ఆప్యాం మహానద్యాం సమస్త పాపక్షయార్థం కర్కాటక గతే దేవగురౌ సార్ధ త్రికోటి తీర్థ సహిత యమునా నది స్నానమహంకరిష్యే’.

పురుషులు స్నానానికి ముందు నది ఒడ్డున మట్టిని తీసుకొని, ‘పిప్పలాదౌ సముత్పన్నే కృత్యే లోక భయంకరే మృత్తికాంతే మయాదత్తం ఆహారార్థం ప్రకల్ప్యతాం’ అనే శ్లోకం చదివి మట్టిని నదిలో వేయాలి. మహిళలు చిటికెడు పసుపును నదిలో వేసి స్నానం చేయాలి.

యమునా దేవిని ధ్యానించేందుకు ‘కాళిందిం భువనైక పావనిం జ్ఞాన వైరాగ్య భక్తి ప్రదాయినిం సూర్యపుత్రీం యమునాం దేవీం భజామి పుణ్యరూపిణీం’ అనే ధ్యాన శ్లోకం పఠించాలి.

దంపతులు కలిసి స్నానం చేయడం మంచిది, ఒకరు లేనప్పుడు వారి వస్త్రాన్ని దగ్గర ఉంచుకుని స్నానం చేయాలి. పుష్కరాల సమయంలో నదీ తీరంలో దానాలు చేయడం వల్ల అనేక రెట్లు ఫలితం లభిస్తుందని పండితులు చెప్పారు.