భారీ వర్షాలతో ఎల్లంపల్లి నుంచి గాయత్రి పంప్ హౌస్‌కు నీటి విడుదల

మంచిర్యాల, జగిత్యాల, నిర్మల్ జిల్లాల్లో కురుస్తున్న భారీ వర్షాలకు ఎల్లంపల్లి ప్రాజెక్టుకు వరద ప్రవాహం భారీగా పెరిగింది. ప్రాజెక్టు నీటి నిల్వ ఈరోజు 9 టీఎంసీలకు చేరింది. పూర్తి సామర్థ్యం 20.175 టీఎంసీలు కాగా, ప్రస్తుతం ఇన్‌ఫ్లో 58,000 క్యూసెక్కులుగా నమోదైంది.

ఎగువ ప్రాంతాల్లో వర్షాలు కొనసాగితే రెండు మూడు రోజుల్లో ప్రాజెక్టు నిండే అవకాశం ఉందని అధికారులు తెలిపారు. దీంతో ప్రాజెక్టు నుంచి గాయత్రి పంప్ హౌస్‌కు నీటిని విడుదల చేయాలని నిర్ణయించారు. పెద్దపల్లి జిల్లా ధర్మారం మండలంలోని నందిమేడారం వద్ద ఈ పంప్ హౌస్ ఉంది.

ఈ నీటి విడుదల కార్యక్రమాన్ని ఎమ్మెల్యే మేడిపల్లి సత్యం ప్రారంభించనున్నారు. గతంలో బీఆర్ఎస్ ప్రభుత్వం కాళేశ్వరం ప్రాజెక్టు రివర్స్ పంపింగ్ ద్వారా ఎల్లంపల్లికి నీటిని ఎత్తిపోసి ఎగువకు సరఫరా చేసింది. బ్యారేజీలు దెబ్బతినడంతో ప్రస్తుత కాంగ్రెస్ ప్రభుత్వం రివర్స్ పంపింగ్ చేయలేదు. ఇప్పుడు వరద నీటిని సాగు కోసం ఉపయోగించుకోవాలని నిర్ణయించింది.

ఇప్పటి వరకు ఎల్లంపల్లి నుంచి హైదరాబాద్ తాగునీటికి మాత్రమే సరఫరా జరిగేది. సాగునీటికి ఇదే తొలిసారి. ఈ నీరు గాయత్రి పంప్ హౌస్ నుంచి లక్ష్మీపూర్ పంప్ హౌస్‌కు, అక్కడి నుంచి మిడ్ మానెరు, ఎస్ఆర్ఎస్పీ వరద కాలువ ద్వారా కొండపోచమ్మ సాగర్, అనంత సాగర్, రంగనాయక సాగర్‌లకు చేరుతుంది. అధికారులు అన్ని ఏర్పాట్లు పూర్తి చేశారు.