జేవార్ ఎయిర్‌పోర్టు షాంఘై, బీజింగ్ కంటే అడ్వాన్స్డ్: సీఎం యోగి

ఉత్తరప్రదేశ్ ముఖ్యమంత్రి యోగి ఆదిత్యనాథ్, జేవార్‌లో నిర్మిస్తున్న అంతర్జాతీయ విమానాశ్రయం షాంఘై, బీజింగ్, సిడ్నీ లాంటి ప్రధాన విమానాశ్రయాల కంటే మరింత అధునాతనంగా ఉంటుందని చెప్పారు. రిపబ్లిక్ వరల్డ్ ఎడిటర్ అర్నబ్ గోస్వామితో ఇటీవల జరిగిన సంభాషణలో ఈ వివరాలు వెల్లడించారు. గతంలో జేవార్ ప్రాంతం మాఫియా ప్రభావంతో సాయంత్రం 5 గంటల తర్వాత ప్రజలు బయటకు రాలేని స్థితిలో ఉండేదని యోగి గుర్తు చేశారు. కానీ, తమ ప్రభుత్వం మాఫియాను సమూలంగా తరిమికొట్టడంతో పరిస్థితి పూర్తిగా మారిపోయిందని, ఇప్పుడు అదే ప్రాంతం దేశంలోనే అత్యంత ఆధునిక విమానాశ్రయానికి వేదికగా మారిందని వివరించారు. జేవార్ ఎయిర్‌పోర్టు నిర్మాణం భారతదేశ అవస్థాపనా రంగంలో ఒక పెద్ద ముందడుగు అని, ఇది ఉత్తరప్రదేశ్‌ను ప్రపంచ విమానయాన మ్యాప్‌లో ప్రత్యేకంగా నిలబెట్టనుందని యోగి పేర్కొన్నారు. మాఫియా నిర్మూలన, మెరుగైన శాంతిభద్రతల కారణంగానే ఇంత పెద్ద ప్రాజెక్టు సాకారం కాగలిగిందని ఆయన చెప్పారు. జేవార్ విమానాశ్రయం 2024 చివరి నాటికి కార్యకలాపాలు ప్రారంభించే అవకాశం ఉంది.