మిర్చి ఎగుమతుల రక్షణకు సమగ్ర కార్యాచరణ: ఉద్యాన వర్సిటీ వీసీ

మిర్చి ఎగుమతులకు ఇబ్బందులు రాకుండా సమగ్ర కార్యాచరణ రూపొందిస్తున్నట్లు YSR ఉద్యాన విశ్వవిద్యాలయం ఉపకులపతి ధనుంజయరావు తెలిపారు.

గుంటూరులోని లాం పరిశోధన కేంద్రంలో జరిగిన సమావేశంలో ఆయన మాట్లాడారు. ఏపీ నుంచి పండ్లు, మిర్చి ఎగుమతులు ఎక్కువగా జరుగుతున్నాయని చెప్పారు. రాష్ట్ర ప్రభుత్వం ఉద్యాన పంటలకు ప్రాధాన్యం ఇస్తోందన్నారు. ప్రకృతి సేద్యాన్ని ప్రోత్సహించేలా ఉద్యాన శాఖ చర్యలు చేపట్టిందన్నారు.

రైతులు ఎక్కువగా స్ప్రేలు వాడుతున్నారని ఆయన అన్నారు. దీంతో రసాయన అవశేషాలు పెరిగి ఆరోగ్య సమస్యలు, క్యాన్సర్ కేసులు పెరుగుతున్నాయన్నారు. ఈ అవశేషాలు ఎక్కువగా ఉండటం వల్ల ఇతర దేశాలు తీసుకోవడం లేదని వివరించారు.

ఈ నేపథ్యంలో LCA 643 అనే కొత్త మిర్చి రకాన్ని జాతీయ స్థాయిలో విడుదల చేశామని ఆయన తెలిపారు. ఈ రకం వైరస్ తెగుళ్లను, నల్ల తామర పురుగులను తట్టుకుంటుంది. ఇప్పటికే 500 కిలోల విత్తనాలను రైతులకు అందించామన్నారు.

రైతులు ఈ రకాన్ని ఎక్కువగా పండించి విత్తన ఉత్పత్తి చేయాలని ప్రోత్సహిస్తున్నామన్నారు. ఉద్యాన శాఖ సహకారంతో ఇది చేస్తున్నట్లు చెప్పారు. స్ప్రేలు తగ్గడం వల్ల ఎగుమతులకు అడ్డంకి కలిగించే రసాయన అవశేషాలు తగ్గుతాయని ఆయన వివరించారు.