ఆర్టీసీ ప్రైవేటీకరణను వ్యతిరేకిస్తూ తిరుపతిలో వైఎస్సార్‌సీపీ నిరసన

తిరుపతి సెంట్రల్ బస్టాండ్ వద్ద ఆర్టీసీ ప్రైవేటీకరణను వ్యతిరేకిస్తూ వైఎస్సార్ కాంగ్రెస్ పార్టీ నాయకుడు భూమన అభినయ రెడ్డి ఆధ్వర్యంలో నిరసన చేపట్టారు.

ఆ తర్వాత ఆర్టీసీ అధికారికి వినతి పత్రం అందజేశారు. ఇప్పటికే 12 డిపోలను ప్రైవేటీకరించారని, ఆర్టీసీకి చెందిన విలువైన భూములను చార్జింగ్ స్టేషన్లతోపాటు ఇతర అవసరాలకు ప్రైవేటు సంస్థలకు ఇస్తున్నారని అభినయ ఆరోపించారు.

ప్రైవేట్ ఆపరేటర్లు ప్రయాణికులకు ఆర్టీసీతో సమానమైన భద్రత కల్పించలేరని ఆయన అనుమానం వ్యక్తం చేశారు. గతంలో విజయవాడలో లులు మాల్‌కు ఆర్టీసీ స్థలం ఇచ్చినప్పుడు చంద్రబాబు నాయుడు కోర్టు ద్వారా స్టే తెచ్చారని, అదే విధంగా ఇప్పుడు ప్రభుత్వం ఎందుకు ఇలాంటి నిర్ణయాలు తీసుకుంటోందని ప్రశ్నించారు.

ప్రభుత్వం ఆర్టీసీ ఉద్యోగుల డిమాండ్లకు అనుగుణంగా నిర్ణయాలు మార్చుకోకపోతే వైఎస్సార్‌సీపీ ఉద్యమించడానికి సిద్ధంగా ఉందని హెచ్చరించారు. ఈ ఆరోపణలు, డిమాండ్లపై ఆర్టీసీ యాజమాన్యం లేదా రాష్ట్ర ప్రభుత్వం స్పందన తెలియాల్సి ఉంది.