రామ మందిరానికి ఇచ్చిన 200 కేజీల వెండి ఎక్కడ?: సింధీ సమాజం నుంచి చంపత్ రాయ్‌కు ప్రశ్నలు

అయోధ్య రామ మందిర నిర్మాణానికి 200 కిలోల వెండి ఇటుకలను దానం చేసిన సింధీ సమాజం, ఆ వెండి ఎక్కడ ఉపయోగించారో చెప్పాలని శ్రీ రామ జన్మభూమి తీర్థ క్షేత్ర ట్రస్ట్ ప్రధాన కార్యదర్శి చంపత్ రాయ్‌ను డిమాండ్ చేస్తోంది. ఈ మేరకు విశ్వ సింధీ సేవా సంగమ్ అధ్యక్షుడు సోమవారం మీడియా సమావేశంలో ప్రశ్నించారు. 2021 జనవరి 26న చంపత్ రాయ్‌కు 200 కిలోల వెండి ఇటుకలను అందజేసినట్లు, కానీ ఇప్పటి వరకు ఎలాంటి రసీదు ఇవ్వలేదని, వెండిని ఎక్కడ, ఎలా వాడారో తెలపాలని కోరారు.

"ఒక్కో ఇటుక ఒక కిలో చొప్పున 200 కిలోల వెండితో ఇటుకలు తయారు చేసి చంపత్ రాయ్‌కు ఇచ్చాం. రసీదు అడిగితే 'చెక్ చేసి ఎక్కడ వాడాలో తర్వాత తెలియజేస్తాం' అన్నారు. దానం కాబట్టి మేం పట్టించుకోలేదు. కానీ ఇటీవల వచ్చిన వార్తలు చూస్తే మా వెండి దుర్వినియోగమైందేమోనని అనుమానం వచ్చింది" అని సంగమ్ అధ్యక్షుడు తెలిపారు. ప్రపంచవ్యాప్తంగా ఉన్న సింధీ కుటుంబాలు ఈ దానంలో పాలుపంచుకున్నాయని, వారంతా ఫోన్ చేసి అడుగుతున్నందున సమాధానం అవసరమన్నారు.

ఆ సమయంలో వెండి విలువ సుమారు ₹1.5-2 కోట్లు ఉండగా ప్రస్తుతం ₹6-7 కోట్లకు చేరింది. దాతలుగా తమకు రసీదు హక్కు ఉందని, రామ మందిరం పేరు మీద సేకరించిన విరాళాలు ఇతర మార్గాల్లో వాడటం తీవ్ర దిగ్భ్రాంతికరమని ఆయన అన్నారు. మోడీ, యోగి ప్రభుత్వం ప్రత్యేక దర్యాప్తు బృందాన్ని (SIT) ఏర్పాటు చేసి దుర్వినియోగం చేసిన వారిపై చర్యలు తీసుకోవాలని విజ్ఞప్తి చేశారు. రామ మందిర ట్రస్ట్ నుంచి ఈ విషయంపై అధికారిక స్పందన రావాల్సి ఉంది.