సైబర్ నేర బాధితులు డబ్బు తిరిగి పొందడానికి 3 సులువైన దశలు

సైబర్ మోసాల బారిన పడిన వారు డబ్బును తిరిగి పొందడానికి మూడు సాధారణ దశలు అనుసరించాలని నిపుణులు సూచిస్తున్నారు. నేరం జరిగిన వెంటనే చర్య తీసుకుంటే డబ్బు తిరిగి వచ్చే అవకాశాలు పెరుగుతాయి.

మొదటి దశ: వెంటనే 1930 హెల్ప్‌లైన్‌కు కాల్ చేయండి. నేరం జరిగిన మొదటి గంటను ‘గోల్డెన్ అవర్’గా పరిగణిస్తారు. ఈ సమయంలో ఫిర్యాదు చేస్తే డబ్బు తిరిగి పొందే అవకాశం 90% వరకు ఉంటుంది.

రెండవ దశ: అవసరమైన వివరాలను సిద్ధంగా ఉంచుకోండి. మీరు డబ్బు పంపించిన ఖాతా నంబర్, మీ బ్యాంకు వివరాలు, మోసగాడి మొబైల్ నంబర్, స్క్రీన్ షాట్‌లు, సందేశాల లింకులు వంటివన్నీ సేకరించండి. వీటితో ఫిర్యాదు ప్రక్రియ వేగవంతం అవుతుంది.

మూడవ దశ: ఆన్‌లైన్‌లో ఫిర్యాదు నమోదు చేయండి. అధికారిక జాతీయ సైబర్ క్రైం రిపోర్టింగ్ పోర్టల్ cybercrime.gov.in లో కంప్లైంట్ రిజిస్టర్ చేయాలి. 1930 హెల్ప్‌లైన్‌కు కాల్ చేయడంతో పాటు ఆన్‌లైన్ ఫిర్యాదు కూడా చేస్తే వేగంగా చర్యలు ఉంటాయి.

అనుమానాస్పద లింకులు, మెసేజ్‌ల పట్ల అప్రమత్తంగా ఉండాలని, మోసం గుర్తించగానే ఆలస్యం చేయకుండా ఫిర్యాదు చేయాలని నిపుణులు సూచిస్తున్నారు.