5,300 ఏళ్ల క్రితం మనిషి ఎముకల్లో కిడ్నీ స్టోన్, అరుగుదల ఆధారాలు కనిపెట్టిన పరిశోధకులు

5,300 సంవత్సరాల క్రితం చనిపోయిన ఒక వ్యక్తి ఎముకలను ఆర్కియాలజిస్టులు, సైంటిస్టులు పరీక్షించారు. ఆ ఎముకల అధ్యయనంలో కిడ్నీ స్టోన్‌కు సంబంధించిన ఆధారాలు కనిపించాయి.

ఆ వ్యక్తి వెన్నుముకలో అరుగుదల గుర్తించారు. భుజాలు, తుంటి, కాళ్ల కీళ్లలోనూ ఎముకలు అరిగిన సంకేతాలు కనిపించాయి. అంటే అతని శరీరంలో ఈ సమస్యలు విస్తృతంగా ఉన్నాయని పరిశోధకులు తెలిపారు.

యుక్తవయసులోనే అతని కాలర్ బోన్ విరిగింది. కుడి భుజం, పక్కటెముకలు, ముంజేతిలో పాత గాయాల జాడలు కనిపించాయి. ఆ గాయాలు నయమైనట్టు ఎముకలు అతుక్కుపోయినట్టు ఆధారాలు ఉన్నాయి. అంటే ఆ కాలంలోనే అతనికి చికిత్స జరిగిందని పరిశోధకులు చెప్తున్నారు. గౌట్ వ్యాధికి సంబంధించిన ఎముక మార్పులూ అధ్యయనంలో కనిపించాయి.

ఎముకలు ఎందుకు అరిగాయనే విషయాన్ని కూడా పరిశోధకులు పరిశీలించారు. ఆ రోజుల్లో ప్రజలు జీవనోపాధి కోసం చాలా దూరం ప్రయాణించేవారు. పశుపోషణ చేసేవారు. పెద్ద బండరాళ్లను ఎత్తేవారు. గుహలో నివసించేందుకు రాళ్లను తొలిచేవారు. ఈ భారీ శారీరక శ్రమ వల్లే అతని ఎముకలు అరిగినట్టు పరిశోధకులు తేల్చారు.

ఈ ఆధారాల ఆధారంగా 5,300 ఏళ్ల క్రితమే ఒక మనిషి కిడ్నీ స్టోన్ బాధతో బాధపడి చనిపోయాడని పరిశోధకులు పేర్కొంటున్నారు. అనారోగ్య సమస్యలు ఇటీవల కాలంలోనే మొదలైనవి కావని ఈ అధ్యయనం చూపిస్తోంది.