94 ఏళ్ల అరిసుత అమెరికా పౌరసత్వం వదిలి భారతీయురాలిగా గుర్తింపు కోసం కలెక్టర్ ముందు ప్రమాణం

గుంటూరు జిల్లాకు చెందిన అరిసుత అనే 94 ఏళ్ల వృద్ధురాలు భారత పౌరసత్వం కోసం దరఖాస్తు చేశారు. 26 ఏళ్ల కిందట అమెరికాలో ఉన్న తన కుమారుడి దగ్గరకు వెళ్లిన ఆమె అక్కడే అమెరికా పౌరసత్వం పొందారు.

ఎనిమిదేళ్ల కిందట సొంతూరికి తిరిగి వచ్చిన అరిసుత అప్పటి నుంచి ఇక్కడే నివసిస్తున్నారు. తాను అమెరికా వ్యక్తిని కాదని, భారతదేశానికి చెందిన వ్యక్తిగా గుర్తింపు కావాలని ఆమె కోరుతున్నారు.

భారత పౌరసత్వం కోసం నిబంధనల ప్రకారం కలెక్టర్ ఎదుట ప్రమాణం చేయాల్సి ఉంటుంది. అరిసుత కూడా కలెక్టర్ కార్యాలయంలో ప్రమాణం చేశారు. ఆ సమయంలో ఆమె తన బాధ్యతలను సక్రమంగా నిర్వర్తిస్తానని వాగ్దానం చేశారు.

ప్రస్తుతం ఈ ప్రక్రియ తర్వాత ఆమెకు ఏ డాక్యుమెంట్ ద్వారా భారత పౌరసత్వం నిర్ధారణ అవుతుందన్న విషయంపై స్పష్టత లేదు. పాస్‌పోర్ట్, ఆధార్, ఓటర్ ఐడీ, రేషన్ కార్డు వంటివి వివిధ అవసరాలకు ఉపయోగపడతాయి కానీ, ప్రత్యేకంగా పౌరసత్వాన్ని ధ్రువీకరించే కార్డు ఉండదని స్థానిక వర్గాలు తెలిపాయి. అరిసుత దరఖాస్తు పరిశీలనలో ఉన్నట్లు సమాచారం.