పోలవరం ప్రాజెక్ట్ ఫేజ్‌-1 గడువు 2027 మార్చి వరకు పొడిగింపు: కేంద్రం

పోలవరం ప్రాజెక్ట్ మొదటి దశ (41.15 మీటర్ల ఎత్తు) నిర్మాణం 2027 మార్చి నాటికి పూర్తవుతుందని కేంద్ర ప్రభుత్వం రాజ్యసభలో వెల్లడించింది.

గతంలో 2026 మార్చి నాటికి ఫేజ్‌-1 పూర్తి చేయాలని లక్ష్యం పెట్టుకున్నా, నిర్మాణం తుది దశలో ఉండటంతో గడువు పొడిగిస్తూ కేంద్ర జలశక్తి శాఖ సహాయ మంత్రి రాజభూషణ్ చౌదరి రాజ్యసభలో లిఖితపూర్వక సమాధానమిచ్చారు. పూర్తి రిజర్వాయర్ స్థాయి 45.72 మీటర్ల కోసం సివిల్ పనులు కొనసాగుతాయని, పవర్‌హౌస్ ఖర్చు రాష్ట్ర ప్రభుత్వం భరించాలని స్పష్టం చేశారు.

ప్రాజెక్ట్‌ కోసం 2021-22 నుంచి 2025-26 మధ్య ఐదు ఆర్థిక సంవత్సరాల్లో కేంద్రం మొత్తం రూ.12,620.53 కోట్లు విడుదల చేసింది. ఫేజ్‌-1 కు సవరించిన అంచనా వ్యయం రూ.30,436 కోట్లు కాగా, ఇంకా రూ.12,157 కోట్ల నిల్వ ఉంది. స్పిల్‌వే, ఎర్త్‌కమ్ రాక్‌ఫిల్ డ్యామ్ పనులు 81% నుంచి 98% వరకు పూర్తయ్యాయి. ప్రధాన కాలువల ఎర్త్‌వర్క్ 98.96%, కాంక్రీట్ పనులు 88.44% పూర్తయినట్లు కేంద్రం తెలిపింది.

పునరావాసం కింద మొత్తం 96,660 కుటుంబాలు ప్రాజెక్ట్ వల్ల స్థానచలనం పొందనుండగా, ఇప్పటివరకు 17,892 కుటుంబాల తరలింపు పూర్తయింది. రిలీఫ్‌ అండ్ రిహాబిలిటేషన్ ప్యాకేజ్‌కు ఇప్పటికే రూ.1,373 కోట్లు ఖర్చు చేసినట్లు, మొత్తం అంచనా రూ.1,581 కోట్లుగా కేంద్రం వివరించింది.