ఖైరతాబాద్ మహాగణపతి శోభాయాత్ర ఒక గంట ఆలస్యంగా ప్రారంభం

హైదరాబాద్‌లోని ఖైరతాబాద్ మహాగణపతి నిమజ్జన కార్యక్రమానికి ఏర్పాట్లు పూర్తయ్యాయి. నేడు శోభాయాత్ర ఒక గంట ఆలస్యంగా ప్రారంభమైనట్లు నిర్వాహకులు తెలిపారు.

69 అడుగుల పంచముఖ సంకట మహాగణపతిని తొమ్మిది రోజుల పాటు భక్తులు దర్శించుకున్నారు. ఉదయం ఆరు గంటలకు శోభాయాత్ర మొదలుపెట్టి మధ్యాహ్నం 12 గంటలకు ముగించాలని అధికారులు ప్రణాళిక చేశారు. అయితే వెల్డింగ్ పనులు, క్రేన్ సమస్య కారణంగా ప్రారంభం ఆలస్యమైంది.

పూజా కార్యక్రమాలు ముగిశాక మహాహారతి ఇచ్చారు. ఆ తర్వాత టస్కర్ పై మహాగణపతిని ఎక్కించారు. శోభాయాత్ర రూట్‌లో ట్రాఫిక్ డైవర్షన్ చేశారు. భక్తులు పెద్ద సంఖ్యలో వచ్చే అవకాశం ఉన్నందున పోలీసులు ప్రత్యేక బందోబస్తు ఏర్పాటు చేశారు.

మండపం నుంచి తెలుగుతల్లి, సచివాలయం మీదుగా శోభాయాత్ర కొనసాగుతుందని నిర్వాహకులు తెలిపారు. నిమజ్జన కార్యక్రమాలను మధ్యాహ్నం ఒంటిగంటలోపు పూర్తి చేసేలా అధికారులు ఏర్పాట్లు చేశారు.