బీజేపీ ఎంపీ కొండా విశ్వేశ్వర్ రెడ్డి ఇథనాల్, పెట్రోల్‌పై ప్రయోగం; E20 వాడకాన్ని సమర్థించారు

ఇటీవల సోషల్ మీడియాలో E20 ఇంధనం (20 శాతం ఇథనాల్ మిశ్రమ పెట్రోల్) వాడకంపై చర్చ జరుగుతోంది. కొంతమంది ఇది పర్యావరణానికి మంచిదని, మరికొందరు వాహనాలకు నష్టం అని అభిప్రాయపడుతున్నారు. ఈ నేపథ్యంలో, బీజేపీ ఎంపీ కొండా విశ్వేశ్వర్ రెడ్డి ఇథనాల్ మరియు పెట్రోల్ యొక్క దహన లక్షణాలను ప్రయోగం ద్వారా ప్రదర్శించారు.

ఆయన రెండు వేర్వేరు పాత్రలలో ఇథనాల్, పెట్రోల్‌ను నింపి, వాటిని మండించారు. ఇథనాల్‌తో నింపిన పాత్రలో మంట నుండి నల్లటి మసి, పొగ ఏమీ రాలేదు. పాత్ర శుభ్రంగానే ఉంది. కానీ పెట్రోల్‌తో నింపిన పాత్ర లోపలి భాగం నల్లగా మారింది, మసి అంటుకుంది. ఇథనాల్ క్లీన్ బర్నింగ్ ఇంధనమని, ఇది వాతావరణంలోకి తక్కువ కార్బన్ డయాక్సైడ్ విడుదల చేస్తుందని ఎంపీ వివరించారు.

అదనంగా, ఇథనాల్ ఆక్టేన్ వాల్యూ ఎక్కువని, కంప్రెషన్ రేషియో అధికమని చెప్పిన ఆయన, పెట్రోల్‌తో పోలిస్తే మైలేజ్ కొద్దిగా తక్కువగా ఉంటుందని తెలిపారు. కొత్త వాహనాల్లో ఈ తేడా కేవలం మూడు శాతం మాత్రమేనని పేర్కొన్నారు. ఇథనాల్ ధర తక్కువగా ఉండటం కూడా ప్రయోజనమేనన్నారు.

ఇథనాల్ ను మొక్కజొన్న, చెరకు వంటి సేంద్రియ పంటల నుండి తయారు చేస్తారు. దీని వల్ల రైతులకు ఆదాయం పెరుగుతుందని, పెట్రోల్ దిగుమతి వల్ల విదేశీ కరెన్సీ ఖర్చు తగ్గుతుందని ఎంపీ కొండా విశ్వేశ్వర్ రెడ్డి వివరించారు. భారత ప్రభుత్వం 2025 నాటికి పెట్రోల్‌లో 20% ఇథనాల్ మిశ్రమ లక్ష్యాన్ని నిర్దేశించుకుంది.