నాగర్కర్నూల్ ఇరిగేషన్ అధికారిపై ACB సోదాలు: ₹7.32 కోట్ల ఆస్తులు గుర్తింపు

నాగర్కర్నూల్ జిల్లా ఇరిగేషన్ అండ్ CAD శాఖ డిప్యూటీ ఎగ్జిక్యూటివ్ ఇంజనీర్ గారీ సత్యనారాయణపై ACB ఆదాయానికి మించిన ఆస్తుల కేసు నమోదు చేసింది. ఆయన నివాసంతో పాటు బంధువులు, స్నేహితులకు చెందిన మరో తొమ్మిది ప్రాంతాల్లో ఏకకాలంలో సోదాలు జరిపింది.

సోదాల్లో రంగారెడ్డి జిల్లా తుక్కుగూడలో 5,200 చదరపు అడుగుల విస్తీర్ణంలో ట్రిప్లెక్స్ విల్లా గుర్తించారు. మహేశ్వరం మండలంలో 342 గజాల స్థలంలో విల్లా ఉంది. కర్మన్ఘాట్‌లోని గేటెడ్ కమ్యూనిటీలో 3BHK ఫ్లాట్, నాగోల్ రాక్ టౌన్‌లో 2BHK ఫ్లాట్ ఉన్నట్లు నిర్ధారించారు.

వనపర్తి జిల్లాలోని షాపూర్ గ్రామంలో 25 ఎకరాల వ్యవసాయ భూమి, ఫార్మ్ హౌస్ ఉన్నాయి. నాగర్‌కర్నూల్‌లో తొమ్మిది ఓపెన్ ప్లాట్లు గుర్తించారు. సుమారు 50 తులాల బంగారు ఆభరణాలు, 2.8 కిలోల వెండి వస్తువులను స్వాధీనం చేసుకున్నారు.

పత్రాల ప్రకారం ఈ ఆస్తుల విలువ ₹7.32 కోట్లకు పైగా ఉంటుంది. మార్కెట్ విలువ ఇంతకు పలు రెట్లు ఎక్కువ ఉండొచ్చని ACB వెల్లడించింది. అనేక ఆస్తులను బినామీల పేర్లపై కొనుగోలు చేసినట్లు తెలుస్తోంది.

ఆదాయానికి మించి ఆస్తులు కూడబెట్టారని గారీ సత్యనారాయణపై ఫిర్యాదులు అందడంతో ఈ సోదాలు చేపట్టినట్లు సమాచారం. ఇరిగేషన్ కార్యాలయంలో పలు కీలక పత్రాలు, డాక్యుమెంట్లను సేకరించారు. బ్యాంకు లాకర్లు తెరిచి మరింత ఆస్తులను పరిశీలించాల్సి ఉంది.