షమీర్పేట్ మాజీ తహసిల్దార్ సుచరితపై అక్రమాస్తుల కేసు నమోదు

షమీర్పేట్ మాజీ తహసిల్దార్ సుచరితపై ఏసీబీ అక్రమాస్తుల కేసు నమోదు చేసింది. ఇప్పటికే లంచం కేసులో అరెస్టయి జైలులో ఉన్న సుచరితపై ఆదాయానికి మించిన ఆస్తులు కూడబెట్టిన ఆరోపణలపై ఈ కొత్త కేసు నమోదైంది.

ఏసీబీ అధికారులు సుచరితకు సంబంధించిన పలు ప్రాంతాల్లో తనిఖీలు నిర్వహించారు. సిద్దిపేటలో 2 ఎకరాల 17 గుంటల వ్యవసాయ భూమి, హైదరాబాద్లో మూడు ఫ్లాట్లు, కేసరా ఖానాపూర్లో రెండు ఫ్లాట్లు ఉన్నట్లు గుర్తించారు. ఇంట్లో 12 లక్షల నగదు, రెండు కార్లు, కోటి 20 లక్షల విలువైన బంగారం, వజ్రాభరణాలు స్వాధీనం చేసుకున్నారు. బ్యాంకు ఖాతాలో 38 లక్షల నిల్వలు ఉన్నాయి. మొత్తం ఆస్తుల విలువ 5 కోట్లకు పైగా ఉంటుందని, మార్కెట్ విలువ ప్రకారం ఇది మరింత ఎక్కువ కావచ్చని ఏసీబీ అంచనా వేస్తోంది.

ఇంతకుముందు లంచం కేసులో సుచరితను ఏసీబీ అరెస్టు చేసింది. ఆ కేసులో ఆమె ప్రస్తుతం రిమాండ్ ఖైదీగా ఉన్నారు. అక్రమాస్తుల కేసుపై దర్యాప్తు కొనసాగుతోంది.