నేరాల నియంత్రణలో సీసీ కెమెరాలు కీలకం: సైబరాబాద్ ఏసీపీ రవికిరణ్

సైబరాబాద్ కమిషనరేట్ పరిధిలో సీసీ కెమెరాల పనితీరు, జియో ట్యాగింగ్‌పై కేపీహెచ్బీ ఏసీపీ రవికిరణ్ రెడ్డి వివరాలు వెల్లడించారు. నేర నియంత్రణ, నేర పరిశోధనల్లో సీసీ కెమెరాలు కీలకంగా మారాయని ఆయన అన్నారు.

సైబరాబాద్ సీపీ ఆదేశాల మేరకు అన్ని పోలీస్ స్టేషన్లలో ఉన్న కెమెరాలను జియో ట్యాగింగ్ చేస్తున్నామని, బ్లాక్ స్పాట్లను గుర్తించి కొత్త కెమెరాలు ఏర్పాటు చేస్తున్నామని ఏసీపీ తెలిపారు. ఐసోలేటెడ్ ప్రాంతాల్లో స్థానిక స్పాన్సర్లు, పెద్ద కంపెనీల సహకారంతో కెమెరాలు పెడుతున్నామన్నారు.

ప్రతి పోలీస్ స్టేషన్లో కమాండ్ కంట్రోల్ వ్యవస్థ ద్వారా కానిస్టేబుళ్లు 12 గంటల షిఫ్ట్లలో సీసీ ఫుటేజీని నిరంతరం పర్యవేక్షిస్తారని, నేరం జరిగితే వెంటనే నిందితుడి కదలికలను గుర్తించి ఫీల్డ్ అధికారులకు సమాచారం అందిస్తారని వివరించారు.

పాడైపోయిన కెమెరాలను గుర్తించి మరమ్మతులు చేయిస్తున్నామని, కాలనీలు, అపార్ట్‌మెంట్లలో సీసీ కెమెరాలు ఏర్పాటు చేసుకోవాలంటూ ప్రచారం చేస్తున్నామని చెప్పారు.

ఇటీవల ఓ కాలనీలో 120 కెమెరాలు జియో ట్యాగింగ్‌తో ఏర్పాటు చేయగా, అప్పటి నుంచి ఒక్క నేరం కూడా జరగలేదని ఉదాహరణగా చెప్పారు. సీసీ కెమెరాల వినియోగం వల్ల నేరాలను గణనీయంగా తగ్గించవచ్చని ఏసీపీ రవికిరణ్ రెడ్డి పేర్కొన్నారు.