ఆదిలాబాద్ రిమ్స్‌లో వెంటిలేటర్ చోరీ: ఇద్దరు అరెస్టు, ఒకరు పరారీ

ఆదిలాబాద్ రిమ్స్ ఆసుపత్రిలో వెంటిలేటర్లు దొంగిలించిన కేసులో ఇద్దరిని పోలీసులు అరెస్టు చేశారు. మహారాష్ట్రకు చెందిన సజ్జన్, హైదరాబాద్‌కు చెందిన వ్యాపారి కొండల్ రెడ్డి అరెస్టు అయిన వారిలో ఉన్నారు. ఈ ముఠాలోని మరో వ్యక్తి అభిజీత్ పరారీలో ఉన్నాడు.

అక్టోబర్ 30న రిమ్స్‌లోని RICU నుంచి నాలుగు వెంటిలేటర్లు దొంగతనం అయ్యాయి. పట్టపగలే ఇద్దరు RICU లోకి చొరబడి వెంటిలేటర్లను తీసుకెళ్లారు. తాము టెక్నీషియన్లమని, డాక్టర్లే పంపించారని చెబుతూ వారు వార్డుల్లోకి వెళ్లేవారని దర్యాప్తులో తెలిసింది. ఎవరు అడిగినా ఇదే సమాధానం చెప్పి అనుమానం రాకుండా చోరీలు చేశారు.

ఈ ముఠా ఇదే పద్ధతిలో నిజామాబాద్‌లోనూ, మహారాష్ట్రలోని యావత్మాల్ వాణి ఆసుపత్రుల్లోనూ చోరీలు చేసినట్టు తెలుస్తోంది. ప్రభుత్వ ఆసుపత్రులనే లక్ష్యంగా చేసుకుని పరికరాలు దొంగిలించినట్టు దర్యాప్తులో వెల్లడైంది. దాదాపు ఏడాది క్రితం ఈ ముఠా సభ్యులు రిమ్స్‌లో మెషీన్లను రిపేర్ చేసేవారని అధికారులు తెలిపారు.

దొంగిలించిన మొత్తం పరికరాలను పోలీసులు స్వాధీనం చేసుకున్నారు. దాదాపు ₹40–50 లక్షల విలువైన పరికరాలు రికవరీ అయినట్టు అధికారులు చెప్పారు. ఈ కేసు CCTV ఫుటేజీ ఆధారంగా గుర్తించినట్టు, ఆసుపత్రుల్లో ఎక్కువ కెమెరాలు ఏర్పాటు చేయాలని అధికారులు సూచించారు. జిల్లాలో ఇటీవల దాదాపు 80 శాతం కేసులు CCTV సాయంతోనే గుర్తిస్తున్నట్టు వారు తెలిపారు.