రైతులకు ఎరువుల మోతాదు సూచనలు: ఆదిలాబాద్ శాస్త్రవేత్త రాజశేఖర్

రైతులు అధిక దిగుబడి కోసం సిఫార్సు చేసిన దానికంటే రెండు, రెండున్నర రెట్లు ఎక్కువ రసాయనిక ఎరువులు వేస్తున్నారని ఆదిలాబాద్ వ్యవసాయ పరిశోధనా కేంద్రం శాస్త్రవేత్త రాజశేఖర్ అన్నారు. ఇలా మోతాదు మించి వాడటం వల్ల ఎరువు సగానికిపైగా వృధా అయి నేల సారం దెబ్బతింటుందని, పెట్టుబడి పెరిగి లాభాలు తగ్గుతాయని వివరించారు.

ఈ సమస్యకు ప్రధాన పరిష్కారం భూసార పరీక్ష అని ఆయన చెప్పారు. ఆ పరీక్ష ద్వారా ఏ పంటకు ఎంత మోతాదు అవసరమో తెలుసుకుని ఖచ్చితంగా ఆ ప్రకారం రసాయనిక ఎరువులు వేయాలని సూచించారు. ఆదిలాబాద్ జిల్లాలో సోయా, కంది వంటి పంటలు ఎక్కువగా సాగవుతున్నందున రైతులు ఈ నియమం పాటించాల్సిన అవసరం ఉందన్నారు.

రసాయనిక ఎరువులతో పాటు సేంద్రియ ఎరువులు వాడాలని, పశువుల పెంటను ఎకరాకు 1-2 టన్నులు, వానపాముల ఎరువును ఒక టను వాడినట్లయితే భూమిలోని సూక్ష్మ జీవులు అభివృద్ధి చెంది నేల ఆరోగ్యం మెరుగవుతుందని తెలిపారు. ఇంకా నీమ్ కోటెడ్ యూరియా వాడటం వల్ల పంటకు నెమ్మదిగా పోషకాలు అంది ఎరువు మోతాదు తగ్గించవచ్చన్నారు. ఫాస్ఫరస్ సాల్యుబలేటింగ్ బ్యాక్టీరియా, పొటాష్ సాల్యుబలేటింగ్ బ్యాక్టీరియా లాంటి జీవ ఎరువులను వాడినా రసాయనిక ఎరువులపై ఆధారపడటం తగ్గుతుందని వివరించారు.

పంట మార్పిడి పాటించడం కూడా రసాయనిక ఎరువుల మోతాదు తగ్గించేందుకు ఉపయోగపడుతుందని రాజశేఖర్ సూచించారు. ఈ సమీకృత విధానాన్ని అవలంబిస్తే పంట ఉత్పత్తి పెరిగి పర్యావరణం కాపాడబడుతుందని ఆయన చెప్పారు.