21వ శతాబ్దంలో న్యాయవాదుల పాత్రపై అంబేద్కర్ కాలేజీలో సదస్సు

హైదరాబాద్‌లోని బాగలింగంపల్లి అంబేద్కర్ కాలేజీ ఆఫ్ లాలో 21వ శతాబ్దంలో న్యాయవాదుల పాత్రపై సదస్సు నిర్వహించారు. రాజ్యసభ ఎంపీ, సుప్రీంకోర్టు సీనియర్ న్యాయవాది వివేక్ తన్ఖా ముఖ్య అతిథిగా హాజరయ్యారు.

ఈ సందర్భంగా వివేక్ తన్ఖా మాట్లాడుతూ, నేరాలు, భూవివాదాలు, కుటుంబ కలహాలు, వ్యాపార సమస్యలు, రాజకీయ సంఘటనలు పెరగడంతో న్యాయవాదుల అవసరం పెరిగిందన్నారు. పేదలు న్యాయవాది ఫీజులు చెల్లించలేని పరిస్థితి ఉండగా, ధనికులు మాత్రం పోలీసు, రెవెన్యూ సపోర్టు పొందుతున్నారని, ఈ అసమతుల్యత సమస్యాత్మకమని అభిప్రాయపడ్డారు. విద్యార్థులకు కోర్టులో వాదించే విధానంపై సలహాలు ఇచ్చారు.

అనంతరం ఇతర అతిథులు మాట్లాడారు. ఎంపీ వంశీ కాలేజీ వ్యవస్థాపకుడు కాకా గారు ఎలాంటి డోనేషన్లు లేకుండా ఈ సంస్థను ప్రారంభించి సమాజానికి ఎంతో మేలు చేశారని కొనియాడారు. కాలేజీ కరెస్పాండెంట్ సరోజా మాట్లాడుతూ, తమ కాలేజీలో డోనేషన్లు తీసుకోమని, చాలా తక్కువ ఫీజు మాత్రమే వసూలు చేస్తామని వివరించారు. 80% మార్కులు, మంచి అటెండెన్స్ ఉన్న విద్యార్థులకు ఉచిత విద్య అందిస్తున్నట్లు తెలిపారు.

వివేక్ తన్ఖా కాలేజీ కొత్త భవనం కోసం రూ.10 లక్షలు విరాళంగా ఇచ్చారు. విద్యార్థులను సుప్రీంకోర్టు, పార్లమెంట్ కు తీసుకువెళ్లి అక్కడి ప్రక్రియలను చూపిస్తానని కూడా ప్రకటించారు.