మీ భూమిలో నిధి దొరికితే ఎవరికి చెందుతుంది? 1878 ట్రెజర్ ట్రోవ్ చట్టం ఏం చెబుతోంది?

భూమిలో నుంచి బంగారం, వజ్రాలు, పురాతన నాణాలు వంటి విలువైన వస్తువులు దొరికితే, అవి ఎవరికి చెందాలనేది 1878 ఇండియన్ ట్రెజర్ ట్రోవ్ చట్టం నిర్ణయిస్తుంది.

ఈ చట్ట ప్రకారం, రూ.10 కంటే ఎక్కువ విలువైన నిధి ఏదైనా ప్రైవేటు భూమిలో దొరికినా, అది ప్రభుత్వానికి చెందుతుంది. 1878లో రూ.10 విలువ చాలా ఎక్కువ. కాలం మారినా ఈ మొత్తాన్ని మార్చకపోవడానికి ఒక కారణం ఉంది. తద్వారా ఎలాంటి విలువైన వస్తువు దొరికినా ప్రభుత్వానికి తెలియజేయాలనే నిబంధన అమల్లో ఉంటుంది. పురావస్తు శాఖ పరిశోధనల కోసం ఇది అవసరం.

నిధి దొరికితే వెంటనే జిల్లా కలెక్టర్ లేదా మండల రెవెన్యూ అధికారికి లిఖితపూర్వకంగా సమాచారం ఇవ్వాలి. ఆ తర్వాత పోలీసు, రెవెన్యూ అధికారులు, ఆర్కియాలజికల్ సర్వే ఆఫ్ ఇండియా (ASI) సిబ్బంది వచ్చి ఆ వస్తువులను పరిశీలిస్తారు. వాటి నాణ్యత, పురాతన విలువ, చారిత్రక ప్రాముఖ్యతను అంచనా వేస్తారు.

నిధి 100 సంవత్సరాల కంటే తక్కువ పురాతనమైతే, దాని విలువలో 20% నుంచి 100% వరకు భూమి యజమాని, నిధిని కనుగొన్న వ్యక్తికి పంపిణీ చేస్తారు. జిల్లా కలెక్టర్ పబ్లిక్ నోటీసు జారీ చేసి, అసలు హక్కుదారు ఎవరైనా ముందుకు వచ్చే అవకాశం కల్పిస్తారు. కానీ 100 సంవత్సరాల కంటే ఎక్కువ పురాతనమైన నిధి అయితే, దాన్ని జాతీయ పురాతన వస్తువుగా వర్గీకరించి 100% ప్రభుత్వ ఆస్తిగా ప్రకటిస్తారు.

నిధి దొరికినా ప్రభుత్వానికి సమాచారం ఇవ్వకుండా దాచిపెట్టినా, లేదా అమ్మేసినా కఠినమైన జరిమానాలు, జైలు శిక్ష కూడా విధిస్తారు. కాబట్టి భూమిలో విలువైన వస్తువులు బయటపడితే, చట్టప్రకారం అధికారులకు తెలియజేయడమే సరైన పద్ధతి.