ఆదిలాబాద్ గిరిజన గూడాల్లో సంప్రదాయ కొడాంగ ఆట

ఆదిలాబాద్ గిరిజన గూడాల్లో ప్రతి ఏటా శ్రావణ మాసంలో చిన్నారులు కొడాంగ ఆట ఆడుతున్నారు. ఎత్తైన కర్రల మీద నిలబడి చిన్న అడుగులు వేస్తూ ఈ ఆటను ప్రదర్శిస్తారు. ఈ కర్రలే తమకు గుర్రాల లాంటివని పిల్లలు చెబుతున్నారు.

వర్షాకాలంలో గ్రామ రహదారులు బురదగా ఉంటాయి. పాములు, కీటకాల నుంచి రక్షణ కోసం పూర్వీకులు ఈ ఆటను ఆడేవారు. అడవికి వెళ్లి నిటారుగా ఉండే కర్రలు తీసుకొస్తారు. వాటికి పూజలు చేసి కొడాంగులను తయారు చేస్తారు.

కర్రపై సమతుల్యతతో నడవడం వల్ల శరీరానికి బలం పెరుగుతుందని గిరిజనులు చెబుతున్నారు. శ్రావణ మాసం మొత్తం ఈ ఆట కొనసాగుతుంది. పొలాల అమావాస్య రోజున గ్రామ దేవతకు మొక్కులు చెల్లించి కొడాంగులను విడిచిపెడతారు.

ఈ సంప్రదాయం ఇప్పటికీ గిరిజన గూడాల్లో కొనసాగుతోంది. పిల్లలకు ఆటతో పాటు వ్యాయామం కూడా లభిస్తోంది.