ఆదోని టీడీపీలో మూడు వర్గాలు: స్థానిక సంస్థల ఎన్నికల ముంగట వర్గ పోరు

ఆదోని నియోజకవర్గంలో తెలుగుదేశం పార్టీ మూడు వర్గాలుగా విడిపోయిన పరిస్థితి కనిపిస్తోంది. నియోజకవర్గ ఇంచార్జ్ మీనాక్షి నాయుడు, మాజీ మార్కెట్ యార్డ్ ఛైర్మన్ మధిర భాస్కర్ రెడ్డి, జిల్లా అధ్యక్షుడు గుడిసే ఆదికృష్ణమ్మలు ప్రత్యేక గ్రూపులుగా మారారు.

పార్టీ ప్రారంభించిన ఇంటింటా తెలుగుదేశం కార్యక్రమంపై ఈ విభేదాలు ప్రభావం చూపిస్తున్నాయి. పాంప్లెట్లు, కరపత్రాలు బూత్ స్థాయి కార్యకర్తలకు అందకపోవడంతో శ్రేణులు ఆవేదన వ్యక్తం చేస్తున్నాయి. మీనాక్షి నాయుడు సమాచారాన్ని కేవలం తన అనుచరులకే పరిమితం చేస్తున్నారనే ఆరోపణలు ఉన్నాయి. ద్వితీయ శ్రేణి నేతలను కలుపుకోవడం లేదని విమర్శలు వస్తున్నాయి.

భాస్కర్ రెడ్డి, ఆదికృష్ణమ్మ వర్గాలు మీనాక్షి నాయుడి నాయకత్వాన్ని వ్యతిరేకిస్తూ తమకు ఇంచార్జ్ బాధ్యతలు ఇవ్వాలని డిమాండ్ చేస్తున్నాయి. అధిష్టానం ఈ విషయంపై ఇంకా నిర్ణయం తీసుకోలేదు. దీంతో నాయకులు ఎవరికి వారు ప్రత్యేకంగా ముందుకెళ్తున్నారు.

ఆదోని రూరల్ ప్రాంతాల్లో వైయస్ఆర్ కాంగ్రెస్ పార్టీ బలమైన క్యాడర్ కలిగి ఉంది. వరుసగా మూడుసార్లు గెలిచిన ఆ పార్టీని ఎదుర్కోవాలంటే టీడీపీ, జనసేన, బీజేపీలు సంయుక్తంగా పనిచేయాల్సిన అవసరం ఉంది. కానీ నేతల మధ్య సమన్వయం లేకపోవడంతో కార్యకర్తల్లో నిరాశ నెలకొంది.

ఇటీవల కర్నూల్ పార్లమెంట్ పరిధిలో పర్యటించిన టీడీపీ అధినేత చంద్రబాబు నాయుడు, జాతీయ ప్రధాన కార్యదర్శి నారా లోకేశ్ వర్గ విభేదాలు వీడి ఏకతాటిపైకి రావాలని సూచించారు. అయితే ఆదోని నేతలు ఈ హెచ్చరికలను పట్టించుకోనట్టుగా కనిపిస్తోంది.

మరోవైపు మీనాక్షి నాయుడు కుటుంబంలో ఇంచార్జ్ పదవి కోసం సోదరుడు ఉమాపతి నాయుడు, మరో బంధువు బలరాం నాయుడు వారసులు పోటీ పడుతున్నారు. సామాజిక వర్గాల ప్రాతినిధ్యం కోసం బీసీ వర్గాలు, రెడ్డి నేతలు కూడా ఒత్తిడి చేస్తున్నారు. స్థానిక సంస్థల ఎన్నికల ఫలితం ఈ అంతర్గత సయోధ్యపై ఆధారపడి ఉంటుందని విశ్లేషకులు అంటున్నారు.