కర్ణాటకలో ఆల్మట్టి డ్యాం గేట్లు ఎత్తివేత; జూరాల, శ్రీశైలం ప్రాజెక్టులకు నీరు

కర్ణాటకలోని ఆల్మట్టి డ్యాం భారీ వరదతో దాదాపు నిండింది. ఎగువ ప్రాంతాల్లో వర్షాలకు శనివారం 88,228 క్యూసెక్కుల ఇన్‌ఫ్లో వచ్చింది. మొత్తం 123 టీఎంసీల సామర్థ్యంలో 108 టీఎంసీల నీరు నిల్వ ఉంది. దీంతో అధికారులు గేట్లు ఎత్తి, 67,500 క్యూసెక్కుల నీటిని నారాయణపూర్ ప్రాజెక్టుకు విడుదల చేశారు.

నారాయణపూర్ డ్యాం కూడా దాదాపు నిండింది. 33 టీఎంసీల సామర్థ్యంలో 31 టీఎంసీల నీరు నిల్వ ఉంది. ఇన్‌ఫ్లో 66,692 క్యూసెక్కులు కాగా, 39,604 క్యూసెక్కులను దిగువకు వదిలారు. ఈ నీరు తెలంగాణలోని జూరాల ప్రాజెక్టుకు సాయంత్రం నాటికి చేరుతుందని అధికారులు తెలిపారు. జూరాల సామర్థ్యం 9.65 టీఎంసీలు కాగా, ప్రస్తుతం 5 టీఎంసీలే నిల్వ ఉంది. 39,000 క్యూసెక్కుల వరద చేరితే, రేపు ఉదయం జూరాల గేట్లు ఎత్తి శ్రీశైలం ప్రాజెక్టుకు నీరు విడుదల చేసే అవకాశం ఉంది.

శ్రీశైలం డ్యాంలో 215 టీఎంసీల సామర్థ్యానికి 41 టీఎంసీల నీరు మాత్రమే ఉంది. ప్రస్తుతం ఎలాంటి ఇన్‌ఫ్లో లేదు. నాగార్జున సాగర్ పరిస్థితి మరింత ఆందోళనకరం. 312 టీఎంసీల సామర్థ్యంలో కేవలం 137 టీఎంసీల నీరు నిల్వ ఉండగా, 6 టీఎంసీల నీరు మాత్రమే తాగునీటి అవసరాలకు అందుబాటులో ఉంటుందని అధికారులు చెబుతున్నారు. ఈ నీరు హైదరాబాద్, నల్గొండ, ఖమ్మం, పల్నాడు, గుంటూరు ప్రాంతాలకు సరిపోతుంది. డిసెంబరు నాటికి నిల్వలు మరింత తగ్గే అవకాశం ఉంది. ఈ ఏడాది ఖరీఫ్ సీజన్‌లో సాగునీటి విడుదలపై అనిశ్చితి నెలకొంది.

తుంగభద్ర డ్యాంకు 14,281 క్యూసెక్కుల ఇన్‌ఫ్లో ఉన్నా, 105 టీఎంసీల సామర్థ్యానికి 30 టీఎంసీల నీరు మాత్రమే నిల్వ ఉంది. కృష్ణా బేసిన్‌లో వరద ప్రవాహం ఆల్మట్టి నుంచి జూరాల మీదుగా శ్రీశైలం వరకు చేరే అవకాశం ఉన్నప్పటికీ, నాగార్జున సాగర్‌కు చేరాలంటే భారీ వర్షాలు అవసరమని అధికారులు తెలిపారు.