ఢిల్లీ అమర్ కాలనీలో బెదిరింపు ఘటన.. 17 ఏళ్ల కుర్రాడిపై కాల్పులు, మృతి

ఢిల్లీలోని అమర్ కాలనీ ప్రాంతంలో ఓ 17 ఏళ్ల కుర్రాడిని కాల్చి చంపారు. స్నేహితురాలిని కామెంట్ చేస్తున్న వ్యక్తులకు ఎదురు నిలవడంతో ఈ దారుణం చోటు చేసుకుంది. మే 26 సాయంత్రం 7.30 గంటల సమయంలో అమర్ కాలనీలోని ఓ హోటల్‌లో ఈ ఘటన జరిగింది. బాధితుడు పరీక్షలు ముగిసిన సందర్భంగా స్నేహితులతో కలిసి సంబరాలు చేసుకుంటున్నాడు. అతని గ్రూపులోని యువతిని కొందరు వ్యక్తులు వెకిలి చేష్టలతో ఇబ్బంది పెట్టారు. దీనిపై ప్రశ్నించడానికి వెళ్లిన బాధితుడిపై ఆగ్రహించిన నిందితుల్లో ఒకరు తుపాకీతో కాల్పులు జరిపాడు.

తీవ్ర రక్తస్రావంతో కుర్రాడిని మొదట మూల్‌చంద్ ఆస్పత్రికి, ఆపై ఎయిమ్స్ ట్రామా సెంటర్‌కు తరలించారు. వెంటిలేటర్‌పై చికిత్స అందించినా పరిస్థితి విషమించి అతను మృతి చెందాడు. ఢిల్లీ పోలీస్ క్రైమ్ బ్రాంచ్ ఈ కేసు దర్యాప్తు చేపట్టింది. ఓ 16 ఏళ్ల మైనర్ నిందితుడిని అదుపులోకి తీసుకుని, ఘటనలో ఉపయోగించిన ఆయుధాన్ని స్వాధీనం చేసుకున్నారు. ఒక్లా ప్రాంతానికి చెందిన 17, 18 ఏళ్ల మరో ఇద్దరు నిందితులను గుర్తించారు. వీరికి నేర చరిత్ర ఉన్నట్లు పోలీసులు తెలిపారు. ఈ ఘటనలో మరిన్ని వివరాలు సేకరించేందుకు పోలీసులు దర్యాప్తు కొనసాగిస్తున్నారు.