అమరావతిలో రాత్రింబవళ్లు నిర్మాణ పనులు, సెక్రటేరియట్, హైకోర్టు భవనాలు వేగంగా నిర్మాణం

అమరావతిలో నిర్మాణ పనులు వేగం పుంజుకున్నాయి. పగలు మాత్రమే కాకుండా రాత్రి వేళల్లోనూ ఫ్లడ్ లైట్ల వెలుగుల్లో పనులు కొనసాగుతున్నాయి. 100 మీటర్ల ఎత్తైన భారీ క్రేన్లు ఉపయోగించి నిర్మాణ సంస్థలు వేగంగా పనులు చేస్తున్నాయి. సిఆర్డిఎ నిర్దేశించిన గడువు లోపు ఐకానిక్ భవనాలు పూర్తి చేసే లక్ష్యంతో కాంట్రాక్ట్ సంస్థలు షిఫ్ట్ల వారీగా పనులు చేస్తున్నాయి.

ఐకానిక్ సెక్రటేరియట్ టవర్ల నిర్మాణంలో డయాగ్రిడ్ టెక్నాలజీ ఉపయోగిస్తున్నారు. కింది నుంచి పైకి 7 నుంచి 9 డైమండ్ ఆకృతులు ఏర్పడేలా ప్రత్యేక ఇంజనీరింగ్ డిజైన్లతో ఈ టవర్లు నిర్మిస్తున్నారు. ప్రస్తుతం 4 అంతస్తులు పూర్తయ్యాయి. ఈ నెలలో తొలి 6 అంతస్తులు పూర్తి చేయాలని లక్ష్యంగా పనులు జరుగుతున్నాయి.

హైకోర్టు భవనం నిర్మాణం కూడా వేగంగా సాగుతోంది. ఫౌండేషన్ పనులు పూర్తయ్యాక కాంక్రీట్ గోడల నిర్మాణం జరుగుతోంది. రాత్రి వేళల్లోనూ జెడ్ స్పీడ్తో పనులు కొనసాగుతున్నాయి. అలాగే ప్రభుత్వాధికారుల టవర్లు, మంత్రులు, ఐఏఎస్ అధికారులు, న్యాయమూర్తుల బంగళాలు కూడా నిర్మిస్తున్నారు.

43 అంతస్తుల క్వాంటం వ్యాలీ టవర్లు, 39 అంతస్తుల నాలుగు హెచ్ఓడి టవర్లు, అసెంబ్లీ టవర్, 36 అంతస్తుల ఏపీ ఎన్ఆర్టి ట్విన్ టవర్లు పూర్తయితే అమరావతి స్కైలైన్ ప్రత్యేక గుర్తింపు పొందనుంది. మౌలిక వసతులలో భాగంగా రహదారులు, ఎల్పీఎస్ లేఔట్లు, పెనుమాక, నీరుకొండ, శేఖమూరు రిజర్వాయర్లు, విద్యా సంస్థల జోన్ల నిర్మాణం కూడా సమాంతరంగా జరుగుతోంది.

ప్రస్తుత ప్రభుత్వం అమరావతిని రాజధానిగా బలోపేతం చేయడానికి ప్రాధాన్యత ఇస్తోంది. దీంతో నిర్మాణ పనులు మరింత ఊపందుకున్నాయి. ఈ ప్రాజెక్టులు పూర్తయితే ఉద్యోగ, వ్యాపార అవకాశాలు పెరగడంతో పాటు రాష్ట్ర రాజధానిగా అమరావతి స్థాయి మెరుగుపడనుంది.