ఏడేళ్ల తర్వాత అమరావతికి ఫెర్రీ సేవలు పునరుద్ధరణ

ఏడేళ్ల విరామం తర్వాత అమరావతి రాజధాని ప్రాంతానికి రవాణా సదుపాయం కల్పించే ఫెర్రీ (పంటు) సేవలు తిరిగి ప్రారంభం కానున్నాయి. ఎన్టీఆర్ జిల్లా ఇబ్రహీంపట్నం మండలంలోని ఫెర్రీ నుంచి గుంటూరు జిల్లా రాయపూడి లింగపాలెం వరకు ఈ సేవలు అందుబాటులోకి వస్తాయి.

గతంలో ఈ ఫెర్రీ సేవలు క్రియాశీలంగా ఉండేవి. అమరావతి నిర్మాణ పనుల కోసం ఇసుక, కంకర, సిమెంటు, స్టీలు వంటి భవన నిర్మాణ సామగ్రిని లారీలు, టిప్పర్ల ద్వారా ఈ ఫెర్రీ మీదుగా తరలించేవారు. ఫెర్రీ ద్వారా రాకపోకలు సాగిస్తే కేవలం 3 కిలోమీటర్ల దూరంలోనే లారీలు రాజధాని ప్రాంతానికి చేరుకోగలవు.

2019లో ప్రభుత్వం మారిన తర్వాత ఈ సేవలు నిలిచిపోయాయి. దీంతో అదే మార్గంలో వెళ్లాలంటే 30 నుంచి 38 కిలోమీటర్లు చుట్టూ తిరిగి వెళ్లాల్సి వచ్చింది. రవాణా ఖర్చు, సమయం పెరగడంతో లారీ యజమానులు ఇబ్బంది పడ్డారు.

ప్రస్తుతం రాజధాని నిర్మాణ పనులు తిరిగి ఊపందుకుంటున్న నేపథ్యంలో పంటు సేవలను పునరుద్ధరించేందుకు నిర్వహకులు సిద్ధమయ్యారు. దీనివల్ల సమయం, ఖర్చు ఆదా కానుండటంతో లారీ యజమానులు సంతోషం వ్యక్తం చేస్తున్నారు. చిన్న వాహనాలు, ఆటోలు, ద్విచక్ర వాహనాలతో పాటు ప్రయాణికులు కూడా ఈ ఫెర్రీ సేవలను వినియోగించుకోవచ్చు.

అయితే, ఫెర్రీ సేవలు పునఃప్రారంభం కావడానికి కృష్ణా నదిలో నీటి మట్టం తగినంతగా ఉండాలి. ప్రస్తుతం ఎగువ నుంచి నీటి ప్రవాహం తక్కువగా ఉన్నా, రాబోయే రోజుల్లో పెరిగే అవకాశం ఉందని నిర్వాహకులు భావిస్తున్నారు. నీటి మట్టం పెరిగితే త్వరలోనే ఫెర్రీ సేవలు అందుబాటులోకి వస్తాయని తెలుస్తోంది.