అమర్నాథ్‌లో సహజ మంచు శివలింగం దాదాపు పూర్తిగా కరిగింది

అమర్నాథ్ యాత్ర ప్రారంభమైన తొలి వారంలోనే పవిత్ర గుహలోని సహజ సిద్ధ మంచు శివలింగం దాదాపు పూర్తిగా కరిగిపోయింది.

మే నెలలో సుమారు ఏడు అడుగుల ఎత్తు ఉన్న ఈ లింగం ఇప్పుడు అదృశ్యమయ్యే స్థితికి చేరింది. ప్రాంతీయంగా పెరుగుతున్న ఉష్ణోగ్రతలు, తీవ్రమైన వడగాలులు, శీతాకాలంలో తగ్గిన మంచు కురిసే శాతం, అలాగే భక్తుల రద్దీ వల్ల గుహలో ఉత్పన్నమవుతున్న మానవ ఉష్ణోగ్రతలు, కాలుష్యం వంటివి ఈ వేగవంతమైన కరిగింపునకు ప్రధాన కారణాలని పర్యావరణ నిపుణులు విశ్లేషిస్తున్నారు.

జూన్ 28న ప్రారంభమైన ఈ 57 రోజుల యాత్రలో ఇప్పటికే లక్షకు పైగా భక్తులు దర్శనం చేసుకున్నారు. రోజుకు 13,000 నుంచి 20,000 మంది వరకు గుహను సందర్శిస్తున్నారు. ఈ భారీ సంఖ్యలో యాత్రికుల వల్ల పర్యావరణ సమతుల్యత దెబ్బతింటుందని శాస్త్రవేత్తలు ఆందోళన వ్యక్తం చేస్తున్నారు.

మంచు లింగం కరిగిపోయినప్పటికీ, ఆ పవిత్ర స్థలం యొక్క ఆధ్యాత్మిక ప్రాధాన్యత కారణంగా భక్తులు నిరుత్సాహపడకుండా భారీ సంఖ్యలో తరలివస్తున్నారు. యాత్రను మే లేదా జూన్ మధ్యలోనే ప్రారంభించి ఉంటే మరింతమందికి మంచులింగ దర్శన భాగ్యం కలిగేదని కొందరు భక్తులు అభిప్రాయపడ్డారు. ప్రభుత్వం కల్పించిన కట్టుదిట్టమైన భద్రత, వసతులపై యాత్రికులు సంతృప్తి వ్యక్తం చేస్తున్నారు.