250వ స్వాతంత్ర్య వేడుకల్లో అమెరికా: చరిత్ర, వలసదారుల పాత్ర, సవాళ్లు

అమెరికా 250వ స్వాతంత్ర్య దినోత్సవం జరుపుకుంటోంది. 1776 జూలై 4న బ్రిటిష్ పాలన నుంచి స్వాతంత్ర్యం పొందిన తర్వాత ఈ దేశం ప్రపంచంలోనే అత్యంత శక్తివంతమైన దేశంగా ఎదిగింది.

తొలుత 13 రాష్ట్రాలతో ఏర్పడిన అమెరికా క్రమంగా విస్తరించింది. 1783 నుంచి 1853 మధ్య కాలంలో భూభాగం మూడింతలకు పెరిగింది. మొదటి ప్రపంచ యుద్ధంలో 1917లో ప్రవేశించి శాంతి చర్చల్లో కీలక పాత్ర పోషించింది.

రెండో ప్రపంచ యుద్ధం ముగిసే సమయానికి అమెరికా ఆర్థిక వ్యవస్థ దాదాపు రెట్టింపయింది. ఐరోపా దేశాల ఆర్థిక వ్యవస్థలు క్షీణించాయి. దీంతో అమెరికా అగ్రశక్తిగా అవతరించింది. ప్రపంచ బ్యాంకు, ఐక్యరాజ్య సమితి లాంటి సంస్థల ఏర్పాటుకు కూడా ముందుండి నడిపించింది.

అమెరికా అభివృద్ధిలో వివిధ దేశాల నుంచి వచ్చిన వలసదార్ల కృషి ఉంది. అమెరికాలోని ఫార్చ్యూన్ 500 కంపెనీల్లో 45 శాతం వలసదారులు లేదా వారి పిల్లలు ప్రారంభించినవి. బిలియన్ డాలర్ల విలువైన స్టార్టప్‌లలో 55 శాతం వలసదార్లు స్థాపించినవి.

అయితే అమెరికాలో జాతి వివక్ష, ధనిక-పేద అంతరం, భద్రతా సమస్యలు లాంటి సవాళ్లు కూడా ఉన్నాయి. 250 ఏళ్ల వేడుకల సందర్భంగా అమెరికా తన చరిత్రను, జాతీయ ఐక్యతను ప్రదర్శించే కార్యక్రమాలు జరుగుతున్నాయి. ట్రంప్ ప్రభుత్వం ఈ వేడుకలకు 150 మిలియన్ డాలర్ల నిధులు కేటాయించింది.