బాపట్ల జిల్లాలో విశ్వేశ్వరాలయంలో పురాతన వైష్ణవ విగ్రహాలు బయటపడ్డాయి

బాపట్ల జిల్లా భట్టిపురోల మండలం ఓలేరు గ్రామంలోని శ్రీ విశ్వేశ్వరాలయంలో పునర్నిర్మాణ పనులు జరుగుతున్నాయి. నిన్న తవ్వకాలు చేస్తుండగా 15 పురాతన రాతి విగ్రహాలు బయటపడ్డాయి.

ఈ ఆలయం సుమారు 300 ఏళ్ల చరిత్ర ఉన్న శివాలయం. ఇది దేవాదయ శాఖ అధీనంలో ఉంది. ప్రొక్లైనర్ సాయంతో జరిపిన తవ్వకాల్లో కొద్దిగా లోతుకు వెళ్లగానే పెద్ద రాళ్లు అడ్డం పడినట్టు కనిపించింది. తర్వాత స్థానికులు జాగ్రత్తగా తవ్వగా ఒక్కొక్కటిగా విగ్రహాలు బయటకు వచ్చాయి.

మొత్తం 15 విగ్రహాల్లో 12 ఆల్వార్ల విగ్రహాలుగా గుర్తించారు. మిగిలిన మూడు విగ్రహాలు లక్ష్మీదేవి, నరసింహ స్వామి, విశ్వక్సేన స్వామివిగా ఉన్నాయి. స్థానికులు ఈ విగ్రహాలను బయటకు తీసి ప్రత్యేక పూజలు చేసి, ఆలయ ప్రాంగణంలో భద్రంగా ఉంచారు.

ఈ విషయాన్ని ఆలయ ఈఓ మల్లేల రమేష్ ఉన్నతాధికారుల దృష్టికి తీసుకెళ్లారు. దేవాదయ శాఖ మాజీ కమిషనర్ ముక్తేశ్వరరావు విగ్రహాలను పరిశీలిస్తున్నారు. ఈ విగ్రహాలు ఏ కాలం నాటివో తెలుసుకునేందుకు పురావస్తు శాఖ అధికారుల సాయం తీసుకుంటున్నారు. శివాలయంలో వైష్ణవ విగ్రహాలు దొరకడం చర్చనీయాంశంగా మారింది.