చేవెళ్ళలో రూ.75 లక్షలతో నగర అభివృద్ధి పనులు ప్రారంభించిన మంత్రి శ్రీధర్ బాబు

తెలంగాణ రాష్ట్ర మంత్రి దుద్దేళ్ళ శ్రీధర్ బాబు చేవెళ్ళ నియోజకవర్గంలో పర్యటించారు. ఈ సందర్భంగా శంకరపల్లి మున్సిపల్ పరిధిలోని బిడిఎల్ జంక్షన్ వద్ద నగర అభివృద్ధి నిధుల నుండి రూ.75 లక్షలతో చేపట్టిన పనులను ప్రారంభించారు. కార్యక్రమంలో స్థానిక ఎమ్మెల్యే కాలే యాదయ్య, జిల్లా గ్రంథాలయ సంస్థ చైర్మన్ ఎలుగంటి మధుసూదన్ రెడ్డి పాల్గొన్నారు.

మంత్రి మాట్లాడుతూ పట్టణ ప్రాంతాల్లో పెరుగుతున్న జనాభాకు అనుగుణంగా మౌలిక వసతులు, రహదారుల అభివృద్ధికి ప్రభుత్వం ప్రాధాన్యత ఇస్తోందని తెలిపారు. ప్రజలకు మెరుగైన జీవన వాతావరణం కల్పించడమే లక్ష్యమని పేర్కొన్నారు.

అనంతరం షాబాద్ వ్యవసాయ మార్కెట్ కమిటీ నిర్వహించిన నాగర్గూడా రైతు సమావేశంలో పాల్గొన్నారు. చేవెళ్ళ రైతులు పండ్లు, కూరగాయల ఉత్పత్తిలో రాష్ట్రానికి గణనీయ సహకారం అందిస్తున్నారని తెలిపారు. రైతులు తాము పండించిన పంటకు నేరుగా కావలసిన ధర పొందే వ్యవస్థ, అంతర్జాతీయ స్థాయిలో ప్రత్యేక గోదాములతో కూడిన మార్కెట్ ఏర్పాటు చేస్తామని ప్రకటించారు.

చేవెళ్ళ ప్రాంతానికి పరిశ్రమలు వస్తున్నాయని, వాటి వల్ల ఉద్యోగాలు, పెట్టుబడులు వచ్చి ఆర్థిక వ్యవస్థ బలపడుతుందని మంత్రి వివరించారు. వ్యవసాయ భూమి విలువ పెరుగుతుందని, ఇండస్ట్రియల్ ఇన్ఫ్రాస్ట్రక్చర్ కార్పొరేషన్ ద్వారా ఈ అభివృద్ధి కార్యక్రమాలను ముందుకు తీసుకెళతామని చెప్పారు.