సీఎం రేవంత్ రెడ్డి పర్యాటక శాఖ సమీక్ష – ఫ్యూచర్ సిటీలో పార్కులు, దుర్గం చెరువు అభివృద్ధి

ముఖ్యమంత్రి రేవంత్ రెడ్డి మంగళవారం హైదరాబాద్‌లోని ఎంసిహెచ్ఆర్డీ బౌద్ధ పెవిలియన్‌లో పర్యాటక శాఖ సమీక్ష నిర్వహించారు. రాష్ట్రంలో పర్యాటక అభివృద్ధికి పలు ఆదేశాలు జారీ చేశారు.

ఫ్యూచర్ సిటీలోని అటవీ భూములను అంతర్జాతీయ పార్కులుగా తీర్చిదిద్దాలని సూచించారు. అర్బన్ ఫారెస్ట్ తరహాలో ఏర్పాట్లు చేయాలన్నారు. జీహెచ్ఎంసీ పరిధిలోని అటవీ శాఖ భూములను పర్యాటక శాఖతో కలిపి ఎకో టూరిజం కేంద్రాలుగా అభివృద్ధి చేయాలన్నారు.

హైదరాబాద్‌లోని మంజీరా, దిల్‌ఖుషా గెస్ట్ హౌస్‌లను ఆధునీకరించాలని, దుర్గం చెరువును పూర్తి స్థాయి టూరిజం స్పాట్‌గా మార్చాలని ఆదేశించారు. తారామతి, భారామతి ప్రాంతాలను కూడా టూరిజం కేంద్రాలుగా అభివృద్ధి చేయాలన్నారు.

టూరిజం హబ్ డెవలప్‌మెంట్ స్కీమ్ కింద వికారాబాద్‌ను అభివృద్ధి చేయాలని, వీరభద్ర స్వామి ఆలయాన్ని యాదాద్రి తరహాలో తీర్చిదిద్దేందుకు కమిటీ ఏర్పాటు చేయాలన్నారు. పురాణపూల్ హెరిటేజ్ వంతెనను పర్యాటకుల కోసం అభివృద్ధి చేయాలని, సాధ్యమైతే ట్రాఫిక్‌ను మళ్లించి వారికి అవకాశం కల్పించాలని సూచించారు.

డిసెంబర్‌లో జరగనున్న గ్లోబల్ ఇన్వెస్ట్‌మెంట్ సమ్మిట్ కోసం ముందస్తు కసరత్తు ప్రారంభించాలని, వివిధ శాఖల మధ్య సమన్వయం కోసం కమిటీలు ఏర్పాటు చేయాలని అధికారులను ఆదేశించారు.