ప్రశ్నోత్తరాల సమాధానాలు ముందే లీక్ చేస్తే చర్యలు: లోక్సభ సెక్రటరియట్

లోక్సభ సెక్రటరియట్ పార్లమెంట్ సభ్యులకు కీలక నిబంధనలు జారీ చేసింది. ప్రశ్నోత్తరాల సమయంలో మంత్రులు ఇచ్చే సమాధానాలను ముందస్తుగా వెల్లడించరాదని ఆదేశించింది.

ప్రశ్నోత్తరాల సమయం ముగిసే వరకు సమాధానాలు అత్యంత గోప్యంగా ఉంచాలని సెక్రటరియట్ బులెటిన్‌లో స్పష్టం చేసింది. లిఖితపూర్వక జవాబులు సభాపతి టేబుల్ పై ఉంచేదాకా రహస్యంగానే ఉండాలి.

గతంలో కొందరు ఎంపీలు సమాధానాలను ముందే మీడియా, సోషల్ మీడియాకు లీక్ చేసిన సంఘటనలు జరిగాయి. ఈ నేపథ్యంలోనే ఈ కఠిన నిబంధనలు తీసుకువచ్చినట్లు తెలుస్తోంది.

లోక్సభలో ఉదయం 11 నుంచి 12 గంటల వరకు, రాజ్యసభలో మధ్యాహ్నం 12 నుంచి 1 గంటల వరకు ప్రశ్నోత్తరాలు జరుగుతాయి. ఈ సమయం ముగియకుండా సమాధానాలు లీక్ చేస్తే అది నిబంధనల ఉల్లంఘన అవుతుందని సెక్రటరియట్ హెచ్చరించింది.

మంత్రులు సభలో అధికారికంగా సమాధానం ఇచ్చిన తర్వాతే ఆ వివరాలు రికార్డుకెళ్తాయని, అప్పుడు మాత్రమే మీడియాకు తెలియజేయాలని సూచించారు. ఈ నెల 20 నుంచి పార్లమెంట్ సమావేశాలు ప్రారంభం కానుండడంతో ఈ బులెటిన్‌ను సెక్రటరియట్ విడుదల చేసింది.