ఆదాయానికి మించిన ఆస్తుల కేసులో డీఎస్పీ భీమ్‌రెడ్డి అరెస్ట్

ఆదాయానికి మించిన ఆస్తుల కేసులో ఏసీబీ అధికారులు డీఎస్పీ భీమ్‌రెడ్డిని అరెస్ట్ చేశారు. ఆయన్ను రాత్రంతా ఏసీబీ కార్యాలయంలో ఉంచారు. వైద్య పరీక్షల నిమిత్తం ఉస్మానియా ఆస్పత్రికి తరలించారు. ఇవాళ కోర్టులో ప్రవేశపెట్టనున్నారు.

ఇటీవల ఏసీబీ భీమ్‌రెడ్డి, ఆయన బంధువులు, బినామీలకు చెందిన 20 ప్రాంతాల్లో సోదాలు చేసింది. సోదాల్లో హైదరాబాద్ పరిసర ప్రాంతాలతో పాటు వికారాబాద్, సంగారెడ్డి జిల్లాల్లో వ్యవసాయ భూములు గుర్తించారు. అలాగే పలు ఫ్లాట్లు, కమర్షియల్ ప్రాజెక్ట్ వాటా కూడా ఉన్నాయి. ఇబ్రహీం బాగ్‌లో విల్లా, గచ్చిబౌలిలో అపార్ట్‌మెంట్, తెల్లాపూర్‌లో రెండు ఫ్లాట్లు వంటివి ఉన్నాయి.

బెంగళూరులో ఆరు ఎకరాలు, మంగళూరులో 38 ఎకరాల భూమి బినామీల పేరిట ఉన్నట్లు ఏసీబీ గుర్తించింది. మొత్తం ఆస్తుల విలువ దాదాపు రూ.300 కోట్లు. సోదాల్లో రూ.3.6 లక్షలు, బినామీ ఇంట్లో రూ.40 లక్షల నగదు లభించింది. అలాగే 2 కిలోల బంగారం, 20 కిలోల వెండి, రూ.19.91 లక్షల బ్యాంకు బ్యాలెన్స్ స్వాధీనం చేశారు. 23 విదేశీ మద్యం బాటిళ్లను ఎక్సైజ్ శాఖకు అప్పగించారు.

భీమ్‌రెడ్డి అనారోగ్యం కారణంగా గతంలో నోటీసులు మాత్రమే ఇవ్వగా, తాజాగా అరెస్ట్ చేశారు. ఆయన్ను ఉద్యోగం నుంచి సస్పెండ్ చేసిన ప్రభుత్వం, బినామీల వివరాలు, బ్యాంకు లావాదేవీలపై దర్యాప్తు కొనసాగిస్తోంది.