ఆంధ్రప్రదేశ్‌లో 10.7% వృద్ధి రేటు నమోదు: జూలై నివేదిక వెల్లడి

ఆంధ్రప్రదేశ్ ప్రణాళిక విభాగం జూలై 2026 నివేదికను విడుదల చేసింది. 2025-26 ఆర్థిక సంవత్సరం రెండో త్రైమాసికంలో రాష్ట్రం 10.7% ఆర్థిక వృద్ధి రేటు సాధించినట్లు నివేదిక వెల్లడించింది. ఈ నివేదికను అధికారులు ముఖ్యమంత్రి చంద్రబాబుకు సచివాలయంలో అందజేశారు.

వ్యవసాయ రంగం 13.5%, పారిశ్రామిక రంగం 10.6%, సేవా రంగం 9.9% వృద్ధి నమోదు చేశాయి. మాంసం ఉత్పత్తి 9.6%, గుడ్ల ఉత్పత్తి 5.1% పెరిగాయి. వాణిజ్య వాహనాల నమోదు 51.6% పెరగడం, GST వసూళ్లు 21% వృద్ధితో ₹13,282 కోట్లకు చేరడం, సాధారణ ఎగుమతులు ₹16,322 కోట్లతో 10.5% వృద్ధి చెందడం విశేషం. ఎస్పీవీ ద్వారా ఎగుమతులు 32.2% పెరిగాయి. రాష్ట్రంలో ₹2.88 లక్షల కోట్ల విలువైన మెగా ప్రాజెక్టులు గ్రౌండింగ్ అయ్యాయని, MSME రంగంలో ₹60,000 కోట్ల పెట్టుబడులు వచ్చినట్లు నివేదిక తెలిపింది.

నివేదికపై స్పందించిన CM చంద్రబాబు, ఎల్నినో వంటి ప్రతికూల పరిస్థితుల్లోనూ ఈ స్థాయి వృద్ధి సాధ్యమైంది ఆర్థిక క్రమశిక్షణ, సాంకేతిక పరిజ్ఞానం విస్తృతంగా వాడడం వల్లే అని చెప్పారు. భవిష్యత్తులో వృద్ధి రేటు 15% కు తీసుకెళ్లాలని లక్ష్యంగా పెట్టుకున్నట్లు తెలిపారు. ప్రతి ప్రభుత్వ శాఖ నిర్దిష్ట ప్రణాళికలతో పనిచేయాలని, సామాన్యుడిపై ధరల భారం పడకుండా చూడాలని అధికారులను ఆదేశించారు. అంతర్జాతీయ మార్కెట్ల ప్రభావం ఎగుమతులపై పడకుండా జాగ్రత్త వహించాలని సూచించారు.

ఇదిలావుండగా, సూపర్ ఎల్నినో ప్రభావంపై ఆర్థిక శాఖ మంత్రి పయ్యావుల కేశవ్ రైతు సేవ కేంద్రాల స్థాయిలో వ్యవసాయ శాస్త్రవేత్తల బృందాలతో క్షేత్ర పరిశీలన చేయిస్తున్నారు. త్వరలో నివేదిక అందించనున్నట్లు మంత్రి తెలిపారు. గత రెండేళ్లుగా జాతీయ సగటు కంటే మెరుగైన వృద్ధిని ఏపీ కొనసాగిస్తోందని నివేదిక పేర్కొంది.