పోలీసులపై దాడులను సహించేది లేదని హోమ్ మంత్రి అనిత హెచ్చరిక; విశాఖలో హోమ్ గార్డుపై కత్తితో దాడి

విశాఖపట్నం లంకెలపాలెం వద్ద విధినిర్వహణలో ఉన్న హోమ్ గార్డు రమణపై శుక్రవారం అర్ధరాత్రి ఓ వ్యక్తి కత్తితో దాడి చేశాడు.

గాయపడిన రమణను హోమ్ మంత్రి వంగలపూడి అనిత ఆస్పత్రిలో పరామర్శించారు. ఆయన ఆరోగ్య పరిస్థితి గురించి వైద్యులను అడిగి తెలుసుకున్నారు. మెరుగైన వైద్యం అందించాలని అధికారులను ఆదేశించారు.

నిందితులను ఇప్పటికే అరెస్ట్ చేసినట్లు హోమ్ మంత్రి తెలిపారు. పోలీసులపై, హోమ్ గార్డులపై దాడులు చేస్తే కఠిన చట్టపరమైన చర్యలు తీసుకుంటామని ఆమె హెచ్చరించారు.

"అర్ధరాత్రి ప్రజల భద్రత కోసం పనిచేస్తున్న సిబ్బందిపై ఇటువంటి దాడులు జరగడం దురదృష్టకరం. ఇలాంటి ఘటనలు పునరావృతం కాకుండా చూసుకోవడం విభాగం బాధ్యత. ప్రజలు కూడా పోలీసు శాఖను గౌరవించాలని, సహకరించాలని కోరుతున్నాను" అని అనిత చెప్పారు.