గంజాయి సాగు సున్నా చేసిన ఈగల్ టాస్క్‌ఫోర్స్‌ను ప్రశంసించిన హోంమంత్రి అనిత; కొత్త వెబ్‌సైట్ ప్రారంభం

అంతర్జాతీయ మాదకద్రవ్యాల వ్యతిరేక దినోత్సవం సందర్భంగా ఆంధ్రప్రదేశ్ హోంమంత్రి వంగలపూడి అనిత శుక్రవారం ఈగల్ టాస్క్ఫోర్స్ ప్రధాన కార్యాలయంలో జరిగిన కార్యక్రమంలో పాల్గొన్నారు. ఈ సందర్భంగా ఈగల్ విభాగం నూతన వెబ్‌సైట్‌ను ఆమె ప్రారంభించారు.

అనంతరం మాట్లాడిన అనిత, గత ప్రభుత్వ కాలంలో గంజాయి సాగుపై నియంత్రణ లేదని, ప్రస్తుత ప్రభుత్వం నేతృత్వంలో దాన్ని సున్నాకు తీసుకువచ్చామని చెప్పారు. ముఖ్యమంత్రి చంద్రబాబు నాయుడు దిశానిర్దేశంలో ఏడాదిన్నర కాలంలో ఈగల్ సిబ్బంది చూపిన అంకితభావాన్ని ఆమె మనస్ఫూర్తిగా అభినందించారు.

ఈగల్ టాస్క్ఫోర్స్ మోడల్‌ను తెలంగాణ, ఒడిశా రాష్ట్రాలు కూడా అనుసరిస్తున్నాయని, ఒడిశా అధికారులు పవర్ పాయింట్ ప్రెజెంటేషన్ కోరినట్లు ఆమె తెలిపారు. రాబోయే రోజుల్లో గంజాయి రవాణా, వినియోగం పూర్తిగా నిర్మూలించే లక్ష్యంతో మరింత సమర్థ ప్రణాళికలు అమలు చేస్తామని హోంమంత్రి ప్రకటించారు.

ఆపరేషన్ చైతన్యం ద్వారా ఇప్పటికే సున్నా సాగు సాధించిన ఈగల్ విభాగం, ఆగస్టులో మొదలయ్యే హార్వెస్టింగ్ సీజన్‌ను దృష్టిలో ఉంచుకుని ఏఎస్ఆర్ జిల్లాలో ప్రత్యేక బృందాలను డిప్లాయ్ చేయనుంది. ప్రతి గ్రామంలో ప్రజలను చైతన్యపరచడంతో పాటు, గంజాయి సాగును పూర్తిగా నిర్మూలించే ప్రయత్నాలు కొనసాగిస్తామని అనిత పేర్కొన్నారు.