AP: 23 పట్టణ స్థానిక సంస్థల ఎన్నికల షెడ్యూల్ ఈరోజు విడుదల

ఆంధ్రప్రదేశ్‌లో పెండింగ్‌లో ఉన్న 23 పట్టణ స్థానిక సంస్థల ఎన్నికల షెడ్యూల్‌ను రాష్ట్ర ఎన్నికల కమిషన్ (SEC) ఈరోజు విడుదల చేయనుంది. మధ్యాహ్నం 12:30 గంటలకు విలేకరుల సమావేశంలో పూర్తి వివరాలు ప్రకటిస్తారు.

ఈ 23 సంస్థల్లో నాలుగు కార్పొరేషన్లు ఉన్నాయి. శ్రీకాకుళం, కాకినాడ, రాజమహేంద్రవరం, మంగళగిరి కార్పొరేషన్లకు ఎన్నికలు జరుగుతాయి. మిగిలిన 19 పురపాలక సంఘాలు, నగర పంచాయతీలకు కూడా పోలింగ్ ఉంటుంది. వాటిలో ఆమదాలవలస, రాజాం, భీమవరం, తాడేపల్లి, తనుకు, చింతలపూడి, నరసరావుపేట, కందుకూరు, కావలి, గూడూరు తదితర పట్టణాలు ఉన్నాయి.

ఈ ఎన్నికలు ఈ నెల 26న తొలి విడత పంచాయతీ పోలింగ్‌తో పాటే జరుగుతాయి. 15 జిల్లాల్లో పోలింగ్ నిర్వహిస్తారు. 28న ఉదయం 8 గంటల నుంచి ఓట్ల లెక్కింపు ప్రారంభమవుతుంది. ఏదైనా అవాంఛనీయ ఘటన జరిగితే 27న పోలింగ్ చేపట్టి, 28న లెక్కింపు చేస్తారు.

ఈ పట్టణ స్థానిక సంస్థల ఎన్నికలు కోర్టు కేసుల కారణంగా పెండింగ్‌లో ఉన్నాయి. ఆ కేసుల పరిష్కారం తర్వాత ఇప్పుడు ఈ ఎన్నికలను చేపడుతున్నారు.

పంచాయతీ ఎన్నికలు మూడు విడతల్లో జరుగుతాయి. తొలి విడత నోటిఫికేషన్ రేపు విడుదల కానుంది. 26న తొలి విడత, 29న రెండో విడత, డిసెంబర్ 2న మూడో విడత పోలింగ్ జరుగుతుంది.