స్వచ్ఛ్ సర్వేక్షణ్ అవార్డులు: ఏపీకి ఆరు పురస్కారాలు, విశాఖకు జాతీయ స్థాయిలో తొలి స్థానం

ఢిల్లీలోని విజ్ఞాన్ భవన్‌లో స్వచ్ఛ్ సర్వేక్షణ్ అవార్డుల ప్రదానోత్సవం జరిగింది. ఈ కార్యక్రమంలో ఆంధ్రప్రదేశ్‌కు ఆరు అవార్డులు లభించాయి. రాష్ట్రపతి ద్రౌపది ముర్ము ఈ అవార్డులను ప్రదానం చేశారు.

10 లక్షలకు పైగా జనాభా ఉన్న నగరాల విభాగంలో విశాఖపట్నం GVMC కి జాతీయ స్థాయిలో మొదటి స్థానం లభించింది. National Clean City విభాగంలో విజయవాడకు మూడో ర్యాంక్ వచ్చింది. Mentor City విభాగంలో తిరుపతి, కుప్పం నగరాలకు మూడో ర్యాంక్ దక్కింది. గుంటూరు నగరానికి కూడా జాతీయ స్థాయిలో మూడో ర్యాంక్ లభించింది.

పారిశుద్ధ్య నిర్వహణలో ఏపీ నగరాలకు ఈ గుర్తింపు లభించింది. చెత్త సేకరణ, వ్యర్థాల నిర్వహణకు రాష్ట్రం ఇస్తున్న ప్రాధాన్యతకు ఈ అవార్డులు దక్కాయి.

అవార్డులను మంత్రి నారాయణ, మున్సిపల్ శాఖ ప్రధాన కార్యదర్శి సురేష్ కుమార్, స్వచ్ఛాంధ్ర కార్పొరేషన్ చైర్మన్ పట్టాభిరాం రాష్ట్రపతి నుంచి అందుకున్నారు. ఈ అవార్డులు సీఎం చంద్రబాబు స్వచ్ఛాంధ్ర కార్యక్రమానికి ఇస్తున్న ప్రాధాన్యత వల్ల వచ్చాయని మంత్రి నారాయణ అన్నారు. ప్రతి నెల మూడో శనివారం రాష్ట్రంలో స్వచ్ఛాంధ్ర కార్యక్రమం నిర్వహిస్తున్నారని ఆయన తెలిపారు. రాష్ట్రంలోని 123 మున్సిపాలిటీలు ఈ పోటీలో పాల్గొన్నాయని, ఆ విభాగంలో మొత్తం 24 అవార్డులు ఉండగా అందులో ఆరు ఏపీకి వచ్చాయని మంత్రి చెప్పారు.

అదే వేడుకలో తెలంగాణకు చెందిన GHMC కి పారిశుద్ధ్య నిర్వహణలో జాతీయ అవార్డు లభించింది. మంత్రి పొన్నం ప్రభాకర్ రాష్ట్రపతి నుంచి అవార్డు అందుకున్నారు. GHMC కి జాతీయ అవార్డు రావడంపై ఆయన హర్షం వ్యక్తం చేశారు.